---

1. Voorbeelde van vertalings uit die Kursus

a. Inleiding (Wat die Kursus sê)

b. Teks (Die Aanvaarding van die Versoening – Hoofstuk 9)

c. Werkboek vir Studente (Vergifnis is die sleutel tot geluk – Les 121)

d. Handleiding vir Onderwysers (Wat is die Eienskappe van God se Onderwysers?)

e. Verklaring van Terme (Geestesdenke – Gees)

2. Bestaande artikels en materiaal oor die Kursus. Dit sal in die toekoms aangevul word.

---

1.

Voorbeelde van vertalings uit die Kursus

1.a.

Wat die Kursus sê

Niks wat werklik is, kan bedreig word nie.

Niks wat onwerklik is, bestaan nie.

Hierin lê die vrede van God.

So begin ’n Kursus in wonders. Dit maak ’n fundamentele onderskeid tussen die werklike en die onwerklike, tussen kennis en persepsie. Kennis is waarheid, onderhewig aan een wet, die wet van liefde of van God. Die waarheid is onveranderlik, ewig en ondubbelsinnig. Dit kan onopgemerk bly, maar nie verander word nie. Dit geld vir alles wat God geskep het, en alleen wat Hy geskep het, is werklik. Dit gaan wat geleer kan word te bowe, want dit lê buite bereik van tyd en prosesse. Dit het geen teenoorgestelde nie, geen begin en geen einde nie. Dit is eenvoudig net.

            Die wêreld van persepsie, aan die ander kant, is die wêreld van tyd, van verandering, van begin en einde. Dit is op interpretasie gebaseer, nie op feite nie. Dit is ’n wêreld van geboorte en dood, gegrond op die geloof in skaarste, verlies, skeiding en dood. Dit word aangeleer eerder as gegee, is selektief en fragmentaries in sy persepsie, onstabiel in sy funksionering, en onakkuraat in sy interpretasies.

            Vanuit kennis en persepsie spruit respektiewelik twee verskillende denksisteme voort wat in alle opsigte teenoorgesteld is. Op die terrein van kennis bestaan daar geen gedagtes apart van God nie, want God en Sy Skepping deel een Wil. Die wêreld van persepsie is egter gemaak deur die geloof in teenoorgesteldes en die geloof in meer as een wil, in ewigdurende konflik met mekaar en met God. Wat persepsie sien en hoor, kom voor om werklikheid te wees, want dit laat alleen in die bewussyn toe dit wat ooreenkom met die wense van die waarnemer. Dit lei tot ’n wêreld van illusies, ’n wêreld wat voortdurend verdedig moet word juis omdat dit nie werklik is nie. 

            Wanneer jy vasgevang is in die wêreld van persepsie, is jy vasgevang in ’n droom. Jy kan nie sonder hulp ontsnap nie, want alles wat jou sintuie jou wys, getuig bloot van die werklikheid van die droom. God verskaf die Antwoord, die enigste Uitweg, die ware Helper. Dit is die funksie van Sy Stem, Sy Heilige Gees, om tussen die twee wêrelde te bemiddel. Hy kan dit doen omdat Hy aan die een kant die waarheid ken en aan die ander kant ook ons illusies herken, maar sonder om daarin te glo. Dit is die Heilige Gees se doel om ons te help ontsnap uit die droomwêreld deur ons te leer hoe om ons denke om te keer en ons foute af te leer. Vergifnis is die Heilige Gees se groot leermiddel om hierdie ommekeer in denke teweeg te bring. Die Kursus het egter sy eie definisie van wat vergifnis werklik is, net soos hy die wêreld op sy eie manier definieer.

            Die wêreld wat ons sien, weerspieël bloot ons eie innerlike verwysingsraamwerk: die dominante idees, wense en emosies in ons geestesdenke (Engels: mind). “Projeksie maak persepsie” (T-13.V.3:5; T-21.Inl.1:1). Ons kyk eers na binne, besluit watter soort wêreld ons wil sien en projekteer dan daardie wêreld na buite en maak dit die waarheid soos ons dit sien. Ons maak dit waar deur ons interpretasies van dit wat ons sien. As ons persepsie gebruik om ons eie foute te regverdig – ons woede, ons neiging om aan te val, ons gebrek aan liefde in watter vorm ook al – sal ons ’n wêreld sien van boosheid, verwoesting, kwaadwilligheid, jaloesie en wanhoop. Ons moet leer om dit alles te vergewe, nie omdat ons “goed” en “lief” is nie, maar omdat dit wat ons sien, nie waar is nie. Ons het die wêreld met ons verwronge verdedigingsmeganismes verdraai, en sien daarom wat nie daar is nie. Soos ons leer om ons perseptuele foute te herken, leer ons ook om daaraan verby te kyk of  te “vergewe”. Terselfdertyd vergewe ons onsself, en kyk verby ons verwronge selfbeeld na die Self wat God in ons en as ons geskep het.

            Sonde word gedefinieer as die “gebrek aan liefde” (T-1.IV.3:1). Aangesien liefde al is wat bestaan, is sonde in die oë van die Heilige Gees ’n fout wat gekorrigeer moet word, eerder as ’n euwel wat gestraf moet word. Ons gevoel van ontoereikendheid, swakheid en onvolledigheid spruit uit ’n sterk belegging  in die “skaarste beginsel” wat die hele wêreld van illusies regeer. Vanuit daardie oogpunt soek ons in ander wat ons voel in ons tekortskiet. Ons het iemand anders “lief” om sélf iets te kry. Dit is trouens wat in ons droomwêreld vir liefde deurgaan. Daar is geen groter fout nie, want liefde is nie in staat om enigiets te vra nie.

            Slegs geestesdenke kan werklik met mekaar verbind, en wat God saamgevoeg het, kan geen mens skei nie (T-17.III.7:3). Dit is egter slegs op die vlak van die Christus Geestesdenke dat ware eenheid moontlik is, en in werklikheid nooit verlore gegaan het nie. Die “klein ek” probeer om homself te vergroot deur eksterne goedkeuring, eksterne besittings en eksterne “liefde”. Die Self wat God geskep het, het niks nodig nie. Dit is vir ewig volledig, veilig, bemind en liefderyk. Dit streef daarna om te deel eerder as om te kry, om uit te brei eerder as om te projekteer. Dit het geen behoeftes nie en wil met andere verbind vanuit ’n wedersydse bewussyn van oorvloed.

            Die spesiale verhoudings van die wêreld is afbrekend, selfsugtig en kinderlik egosentries. Maar, as hulle vir die Heilige Gees gegee word, kan hierdie verhoudings die heiligste ter wêreld word – die wonders wat die pad terug Hemel toe aandui. Die wêreld gebruik sy spesiale verhoudings as ’n uiteindelike wapen van uitsluiting en ’n bewys van afgeskeidenheid. Die Heilige Gees transformeer hulle tot volmaakte lesse in vergifnis en in ontwaking uit die droom. Elke les is ’n geleentheid om persepsies te laat genees en foute te laat korrigeer. Elke les is nog ’n kans om jouself te vergewe deur ’n ander te vergewe. En elke les word ’n nuwe uitnodiging aan die Heilige Gees en die herinnering van God.

            Persepsie is ’n funksie van die liggaam, en behels daarom ’n beperking van die bewussyn. Persepsie sien met die oë van die liggaam en hoor met die ore van die liggaam. Dit veroorsaak die beperkte reaksies wat die liggaam uitvoer. Die liggaam blyk grootliks selfmotiverend en onafhanklik te wees, maar hy reageer in werklikheid alleenlik op die intensies van die geestesdenke. As die geestesdenke hom vir enige vorm van aanval wil gebruik, word hy die prooi van siekte, ouderdom en verval. As die geestesdenke in plaas daarvan die doel wat die Heilige Gees daarvoor het, aanvaar, word hy ’n nuttige medium om met ander te kommunikeer, onkwetsbaar solank as wat nodig is, en om sagweg afgelê te word wanneer hy nie meer van nut is nie. Op sigself is die liggaam neutraal, soos alles in die wêreld van persepsie is. Of hy vir die doeleindes van die ego of die Heilige Gees gebruik word, hang volkome af van wat die geestesdenke wil hê.

            Die teenoorgestelde van sien met die oë van die liggaam, is die visie van Christus, wat krag eerder as skeiding, en liefde eerder as vrees weerspieël. Die teenoorgestelde van hoor met die liggaam se ore, is kommunikasie deur die Stem namens God, die Heilige Gees, wat in elkeen van ons woon. Sy Stem lyk ver weg te wees en moeilik om te hoor, omdat die ego, wat vir die klein, geskeide self praat, baie harder voorkom. In werklikheid is dit net omgekeerd. Die Heilige Gees praat met onmiskenbare helderheid en oorweldigende aantrekkingskrag. Niemand wat nie verkies om met die liggaam te identifiseer nie, sou enigsins doof kon wees vir Sy boodskap van bevryding en hoop, nóg sou so ’n persoon kon versuim om die visie van Christus vreugdevol te aanvaar in ruil vir sy eie armsalige beeld van homself.

            Christus se visie is die Heilige Gees se gawe, God se alternatief vir die illusie van skeiding en vir die geloof in die werklikheid van sonde, skuld en dood. Dit is die één korreksie vir alle persepsiefoute, die versoening van die skynbare teenoorgesteldes waarop hierdie wêreld gebaseer is. Sy milde lig laat jou alles vanuit ’n ander gesigspunt sien, en weerspieël die denksisteem wat uit kennis voortspruit en die terugkeer na God nie net moontlik nie, maar ook onvermydelik maak. Wat beskou was as onreg wat iemand deur ’n ander aangedoen was, word nou ’n roep om hulp en éénheid. Sonde, siekte en aanval word nou gesien as wanpersepsies wat roep om genesing deur middel van vriendelikheid en liefde. Verdedigingsmeganismes word laat vaar, want waar daar geen aanval is nie, is daar geen behoefte daaraan nie. Ons broers se behoeftes word ons eie, want hulle onderneem die reis saam met ons op pad na God toe. Sonder ons sou hulle die pad byster raak. Sonder hulle sou ons nooit ons pad kon vind nie.

1.b.

Hoofstuk 9

DIE  AANVAARDING  VAN  DIE  VERSOENING

I. Die aanvaarding van die werklikheid

1. Vrees vir die Wil van God is een van die eienaardigste geloofsoortuigings wat die menslike geestesdenke ooit gemaak het. ²Dit sou nooit kon gebeur het as die geestesdenke nie alreeds diep gesplete was nie, wat dit vir hom moontlik gemaak het om bang te wees vir wat hy werklik is. ³Die werklikheid kan niks behalwe illusies “bedreig” nie, aangesien die werklikheid alleen die waarheid kan handhaaf. ⁴Die einste feit dat die Wil van God, wat ook is wat jy is, gesien word as vreeswekkend, bewys dat jy bang is vir wat jy is. ⁵Dit is dus nie die Wil van God waarvoor jy bang is nie, maar jou eie.
2. Jou wil is nie die ego s’n nie, en dit is waarom die ego teen jou is. ²Wat die vrees vir God blyk te wees, is inderdaad die vrees vir jou eie werklikheid. ³Dit is onmoontlik om iets op ’n konsekwente wyse te leer in ’n paniektoestand. ⁴As dit die doel van hierdie kursus is om jou te help om te onthou wat jy is, en as jy glo dat wat jy is vreeswekkend is, dan moet daaruit volg dat jy nie hierdie kursus sal leer nie. ⁵Maar die rasionaal vir die kursus is juis dat jy nie weet wat jy is nie.
3. As jy nie weet wat jou werklikheid is nie, hoekom is jy dan so seker daarvan dat dit vreeswekkend is? ²Die verbandlegging tussen waarheid en vrees, wat op sy beste  hoogs kunsmatig sou wees, is veral onvanpas in die geestesdenke van diegene wat nie weet wat die waarheid is nie. ³Al wat dit kan beteken, is dat jy willekeurig iets buite jou bewustheid in verband bring met iets wat jy nie wil hê nie. ⁴Dit is dan ook duidelik dat jy iets beoordeel waarvan jy totaal onbewus is. ⁵Jy het hierdie eienaardige situasie begin, sodat dit onmoontlik is om daaraan te ontsnap sonder ’n Gids wat wel weet wat jou werklikheid is. ⁶Die doel van hierdie Gids is bloot om jou te herinner aan wat jy wil hê. ⁷Hy probeer nie om ’n vreemde wil  aan jou op te dring nie. ⁸Hy wend bloot elke moontlike poging aan om, binne die beperkinge wat jy Hom opgelê het, jou eie wil in jou bewussyn te herstel.
4. Jy het jou wil in gevangenskap geplaas, buite jou eie bewustheid, waar hy wel bly bestaan, maar jou nie kan help nie. ²Toe ek gesê het dat dit die Heilige Gees se funksie is om die ware van die onware in jou geestesdenke uit te sorteer, het ek bedoel dat Hy oor die mag beskik om te ondersoek wat jy weggesteek het en die Wil van God daar te herken. ³Deurdat hy hierdie Wil herken, kan dit vir jou werklikheid word, want Hy is in jou geestesdenke, en daarom is Hy jou werklikheid. ⁴As Sy persepsie van jou geestesdenke dus die werklikheid daarvan vir jou bring, help Hy jou wel om te onthou wat jy is. ⁵Die enigste bron van vrees in hierdie proses lê in wat jy dink jy sal verloor. Nogtans kan jy slegs besit wat die Heilige Gees sien.   
5. Ek het dit al baie keer beklemtoon dat die Heilige Gees jou nooit sal oproep tot enige opoffering nie. ²Maar as jy die opoffering van die werklikheid van jouself vra, moet die Heilige Gees jou daaraan herinner dat dit nie God se Wil is nie, omdat dit nie joune is nie. ³Daar is geen verskil tussen jou wil en die Wil van God nie. ⁴As jy nie ’n gesplete geestesdenke gehad het nie, sou jy insien dat om te wil verlossing beteken omdat dit kommunikasie is.
6. Dit is onmoontlik om in vreemde tale met mekaar te kommunikeer. ²Jy en jou Skepper kan deur skepping kommunikeer, omdat dit en dit alleen Julle gesamentlike Wil is. ³Die verdeelde geestesdenke kan nie kommunikeer nie, want hy beywer hom vir verskillende dinge in een en dieselfde geestesdenke. ⁴Dit laat die vermoë om eenvoudig te kommunikeer verlore gaan, want verwarde kommunikasie beteken niks nie. ⁵’n Boodskap kan nie gekommunikeer word as dit nie sin het nie. ⁶Hoe verstandig kan jou boodskappe wees as jy vra vir wat jy nie wil hê nie? ⁷Maar solank jy bang vir jou wil is, is dit presies waarvoor jy vra.
7. Jy hou moontlik vol dat die Heilige Gees jou nie antwoord nie, maar dalk is dit wyser om die soort vraesteller wat jy is, in oënskou te neem. ²Jy vra nie uitsluitend vir wat jy wil hê nie. ³Dit is omdat jy bang is dat jy dit kan ontvang, wat natuurlik die geval sou wees. ⁴Daarom hou jy aan om die onderwyser juis te vra wat nie moontlik is om vir jou te gee nie. ⁵Van hom kan jy nooit leer wat dit is nie, en dit gee jou die illusie van veiligheid. ⁶Jy kan egter nie veilig wees van die waarheid nie, maar alleen in die waarheid. ⁷Die werklikheid is die enigste veiligheid. ⁸Jou wil is jou verlossing, want dit is dieselfde as die Wil van God. ⁹Die skeiding is niks anders as die geloof dat dit verskil nie.
8. Niemand wat reg dink, kan glo dat sy wil sterker as God se Wil is nie. ²As iemand se geestesdenke glo dat sy wil verskil van Syne, kan hy slegs besluit dat daar óf geen God is nie óf dat God se Wil vreesaanjaend is. ³Die eersgenoemde verklaar die ateïs, en die laasgenoemde die martelaar wat glo dat God opoffering vra. ⁴Elkeen van hierdie kranksinnige besluite sal paniek veroorsaak, want die ateïs glo hy is alleen, en die martelaar glo dat God hom kruisig. ⁵Nogtans verlang niemand werklik eensaamheid of vergelding nie, alhoewel baie miskien beide soek. ⁶Kan jy die Heilige Gees vir “gawes” soos hierdie vra, en regtig verwag om hulle te ontvang? ⁷Hy kan jou nie iets gee wat jy nie wil hê nie. ⁸Wanneer jy die Universele Gewer vra vir wat jy nie wil hê nie, vra jy vir wat jy nie gegee kan word nie omdat dit nooit geskep was nie. ⁹Dit was nooit geskep nie, omdat dit nooit jou wil vir jou was nie.
9. Uiteindelik moet iedereen die Wil van God onthou, want uiteindelik moet iedereen homself herken. ²Hierdie herkenning is die herkenning dat sy wil en God se Wil een is. ³In die teenwoordigheid van die waarheid is daar geen ongelowiges en geen opofferings nie. ⁴In die veiligheid van die werklikheid is vrees totaal betekenisloos. ⁵Om te ontken wat is, kan alleenlik angswekkend lyk. ⁶Vrees kan nie werklik wees sonder ’n oorsaak nie, en God is die enigste Oorsaak. ⁷God is Liefde en jy wil Hom inderdaad hê. ⁸Dit is jou wil. ⁹Vra hiervoor en jy sal verhoor word, omdat jy alleenlik  vra vir wat aan jou behoort.
10. As jy die Heilige Gees vra vir wat jou sou seermaak, kan Hy nie antwoord nie, want niks kan jou seermaak nie, en dus vra jy vir niks nie. ²Enige wens wat uit die ego voortspruit, is ’n wens vir niks nie, en om daarom te vra, is nie ’n versoek nie. ³Dit is bloot ’n ontkenning in die vorm van ’n versoek. ⁴Die Heilige Gees bekommer hom nie oor vorm nie, omdat hy slegs van betekenis bewus is. ⁵Die ego kan nie die Heilige Gees vir iets vra nie, omdat daar ’n totale gebrek aan kommunikasie tussen hulle bestaan. ⁶Maar jy kan die Heilige Gees vir enigiets vra, want jou versoeke aan Hom is werklik, omdat hulle uit die deel van jou kom wat reg is. ⁷Sou die Heilige Gees die Wil van God ontken? ⁸En sou Hy kon nalaat om dit in Sy Seun te herken?
11. Jy besef nie die enorme hoeveelheid energie wat jy bestee om die waarheid te ontken nie. ²Wat sou jy sê van iemand wat net eenvoudig aanhou om die onmoontlike te probeer, in die vaste oortuiging dat om dit te bereik, sukses beteken? ³Die oortuiging dat jy die onmoontlike moet besit om gelukkig te kan wees, is totaal in stryd met die beginsel van die skepping. ⁴God sou onmoontlik nie wil dat geluk afhang van wat jy nooit sou kon hê nie. ⁵Die feit dat God Liefde is, vereis geen geloof nie, maar wel aanvaarding. ⁶Dit is wel vir jou moontlik om feite te ontken, ofskoon dit vir jou onmoontlik is om hulle te verander. ⁷As jy jou hande voor jou oë hou, sal jy nie sien nie omdat jy die wette om te sien, dwarsboom. ⁸As jy die liefde ontken, sal jy dit nie ken nie, omdat jou samewerking die wet van sy wese is. ⁹Jy kan nie wette verander wat jy nie gemaak het nie, en die wette van geluk was vir jou geskep, nie deur jou nie.
12. Enige poging om te ontken wat is,moet angswekkend wees, en as dit ’n sterk poging is, sal dit paniek veroorsaak. ²Om te wil teen die werklikheid kan, hoewel onmoontlik,  tot ’n baie hardnekkige doel gemaak word, selfs al wil jy hom nie hê nie. ³Maar oorweeg die gevolge van hierdie vreemde besluit. ⁴Jy wy jou geestesdenke aan wat jy nie wil hê nie. ⁵Hoe eg kan hierdie toewyding wees? ⁶As jy hom nie wil hê nie, was hy nooit geskep nie. ⁷As hy nooit geskep was nie, is hy niks nie. ⁸Kan jy jou werklik wy aan niks?
13. In Sy toewyding aan jou het God jou aan alles toegewyd geskep, en jou dit gegee waaraan jy toegewyd is. ²Anders sou jy nie volmaak geskep gewees het nie. ³Die werklikheid is alles, en jy het alles, want jy is werklik. ⁴Jy kan nie die onwerklike maak nie, want die afwesigheid van die werklikheid is vreesaanjaend, en vrees kan nie geskep word nie. ⁵Solank jy glo dat vrees moontlik is, sal jy nie skep nie. ⁶Teenoorgestelde ordes van werklikheid maak die werklikheid betekenisloos, en die werklikheid is betekenis.
14. Onthou dan dat God se Wil nou reeds moontlik is, en niks anders sal ooit wees nie. ²Dit is die eenvoudige aanvaarding van die werklikheid, want dit alleen is werklik. ³Jy kan nie die werklikheid verdraai en weet wat dit is nie. ⁴En as jy wel die werklikheid verdraai, sal jy angs ervaar, depressie en uiteindelik paniek, omdat jy probeer om jouself onwerklik te maak. ⁵Wanneer jy hierdie dinge voel, moenie probeer om buite jouself die waarheid te soek nie, want die waarheid kan alleen binne-in jou wees. ⁶Sê daarom:

⁷Christus is in my, en waar Hy is, moet God wees,

want Christus is deel van Hom.

II. Die antwoord op gebed

1. Elkeen wat ooit probeer het om gebed te gebruik ten einde vir iets te vra, het al ervaar wat mislukking blyk te wees. ²Dit is nie alleen waar met betrekking tot spesifieke sake wat skadelik sou kon wees nie, maar ook met betrekking tot versoeke wat ten nouste in ooreenstemming met hierdie kursus is. ³Die laasgenoemde mag veral verkeerdelik geïnterpreteer word as “bewys” dat die kursus nie bedoel wat hy sê nie. ⁴Jy moet egter onthou dat die kursus herhaaldelik verklaar dat sy doel die ontsnapping aan vrees is.
2. Laat ons dan veronderstel dat wat jy van die Heilige Gees vra, dít is wat jy werklik wil hê, maar waarvoor jy nog steeds bang is. ²As dit die geval is, dan sou jou bereiking daarvan nie langer wees wat jy wil hê nie. ³Dit is die rede waarom spesifieke vorme van genesing nie bereik word nie, selfs al word die staat van genesing self bereik. ⁴Iemand mag vir fisiese genesing vra omdat hy bang is vir liggaamlike pyn. ⁵Terselfdertyd, as hy fisies genees sou wees, sou die bedreiging vir sy denksisteem aansienlik meer kon wees as vir die fisiese uitdrukking daarvan. ⁶In hierdie geval vra hy nie werklik vir bevryding van vrees nie, maar vir die verwydering van ’n simptoom wat hyself gekies het. ⁷Dit is dus hoegenaamd nie ’n versoek om genesing nie.
3. Die Bybel beklemtoon dat jy alles wat jy in gebed vra, sal ontvang, en dit is inderdaad waar. ²Net die feit dat die Heilige Gees gevra is vir iets, sal ’n antwoord verseker. ³Maar dit is net so seker dat geen enkele antwoord wat deur Hom gegee word, ooit een sal wees wat vrees sou aanwakker nie. ⁴Dit is moontlik dat sy antwoord nie gehoor sal word nie. ⁵Maar dit is egter onmoontlik dat hy verlore sal gaan. ⁶Daar is baie antwoorde wat jy al ontvang het, maar nog nie gehoor het nie. ⁷Ek verseker jou dat hulle vir jou wag.
4. As jy wil weet of jou gebede verhoor is, moet dan nooit aan ’n Seun van God twyfel nie. ²Bevraagteken hom nie en maak hom nie onseker of deurmekaar nie, want jou geloof in hom is jou geloof in jouself. ³As jy God en Sy Antwoord wil ken, glo dan in my wie se geloof in jou nie gewankel kan word nie. ⁴Kan jy opreg van die Heilige Gees vra, en aan jou broer twyfel? ⁵Glo dat sy woorde waar is vanweë die waarheid wat in hom is. ⁶Jy sal met die waarheid in hom verenig, en sy woorde sal waar wees. ⁷Wanneer jy hom hoor, sal jy my hoor. ⁸Om te luister na die waarheid is die enigste manier waarop jy dit nou kan hoor en uiteindelik kan ken.    
5. Die boodskap wat jou broer jou gee, berus by jou. ²Wat sê hy vir jou? ³Wat wil jy hê moet hy sê? ⁴Jou besluit oor hom bepaal die boodskap wat jy ontvang. ⁵Onthou dat die Heilige Gees in hom is, en dat Sy Stem deur hom met jou praat. ⁶Wat kan so ’n heilige broer jou vertel, behalwe die waarheid? ⁷Maar luister jy daarna? ⁸Jou broer mag dalk nie weet wie hy is nie, maar daar is ’n lig in sy geestesdenke wat wel weet. ⁹Hierdie lig kan joune binneskyn, aan sy woorde waarheid verleen en jou in staat stel om hulle te hoor. ¹⁰Sy woorde is die Heilige Gees se antwoord aan jou. ¹¹Is jou geloof in hom sterk genoeg om jou te laat hoor?
6. Jy kan net so min alleen vir jouself bid, as wat jy alleen vir jouself vreugde kan vind. ²Gebed is die herformulering van inklusiwiteit onder leiding van die Heilige Gees volgens die wette van God. ³Verlossing kom van jou broer. ⁴Die Heilige Gees brei van jou geestesdenke na syne uit, en antwoord jou. ⁵Jy kan nie die Stem namens God net in jouself hoor nie, want jy is nie alleen nie. ⁶En Sy antwoord is alleenlik  bestem vir wat jy is. ⁷Jy sal die vertroue wat ek in jou het nie ken nie, tensy jy dit uitbrei. ⁸Jy sal nie die leiding van die Heilige Gees vertrou, of glo dat dit vir jou bestem is nie, tensy jy dit in ander hoor. ⁹Dit moet vir jou broer bestem wees, omdat dit vir jou bestem is. ¹⁰Sou God vir jou alleen ’n Stem geskep het? ¹¹Sou jy Sy antwoord kon hoor sonder dat Hy al die Seuns van God antwoord gee? ¹²Hoor van jou broer wat jy wil hê ek van jou moet hoor, want jy sou nie wil hê dat ek mislei word nie.      
7. Soos God, het ek jou lief vir die waarheid in jou. ²Jou misleidinge kan jóú miskien mislei, maar nie vir my nie. ³Omdat ek weet wat jy is, kan ek nie aan jou twyfel nie. ⁴Ek hoor alleen die Heilige Gees in jou wat deur jou met my praat. ⁵As jy my wil hoor, hoor my broers in wie God se Stem praat. ⁶Die antwoord op alle gebede lê in hulle. ⁷Jy sal beantwoord word soos jy die antwoord in elkeen hoor. ⁸Moenie na enigiets anders luister nie, of jy sal nie waarlik hoor nie.
8. Glo in jou broers omdat ek in jou glo, en jy sal leer dat my geloof in jou geregverdig is. ²Glo in my deur in hulle te glo, ter wille van dít wat God hulle gegee het. ³Hulle sal jou antwoord as jy leer om slegs die waarheid van hulle te vra. ⁴Moenie vir seëninge vra sonder om hulle te seën nie, want slegs op hierdie manier kan jy leer hoe geseënd jy is. ⁵Deur hierdie pad te volg, soek jy die waarheid in jou. ⁶Dit lei jou nie buite jouself nie, maar na jouself. ⁷Hoor alleen God se Antwoord in Sy Seuns, en jy is verhoor.
9. Om nie te glo nie, is om kant te kies teen iets, of om aan te val. ²Om te glo, is om te aanvaar, en kant te kies vir. ³Om te glo, beteken nie om goedgelowig te wees nie, maar om te aanvaar en te waardeer. ⁴Wat jy nie glo nie, waardeer jy nie, en jy kan nie dankbaar wees vir iets waaraan jy nie waarde heg nie. ⁵Daar is ’n prys wat jy sal betaal vir oordeel, want oordeel beteken die vasstelling van ’n prys. ⁶En soos jy dit vasstel, sal jy dit betaal.
10. As betaal gelykgestel word met kry, sal jy ’n lae prys vasstel, maar ’n hoë opbrengs eis. ² Jy vergeet dan egter dat om te prys, beteken om waarde vas te stel, sodat jou opbrengs in verhouding staan tot jou waardeoordeel. ³As betaal met gee geassosieer word, kan dit nie as verlies gesien word nie, en word die wederkerige verhouding van gee en ontvang ingesien. ⁴Daar sal dan ’n hoë prys vasgestel word vanweë die waarde van die opbrengs. ⁵Die prys vir kry, is dat jy waarde uit die oog verloor, wat dit onvermydelik maak dat jy nie sal waardeer wat jy ontvang nie. ⁶Omdat jy dit weinig waardeer, sal jy dit nie op prys stel nie en ook nie wil hê nie.
11. Vergeet dus nooit dat jy die waarde bepaal op grond van wat jy ontvang, en die prys daarvan bepaal deur wat jy gee nie. ²Om te glo dat dit moontlik is om baie vir min te kry, is om te glo dat jy met God kan kwansel en knibbel. ³God se wette is altyd regverdig  en volkome konsekwent. ⁴Deur te gee, ontvang jy. ⁵Maar om te ontvang, is om te aanvaar, nie om te kry nie. ⁶Dit is onmoontlik om nie te hê nie, maar dit is moontlik om nie te weet dat jy het nie. ⁷Die herkenning dat jy het, is die gewilligheid om te gee, en alleenlik deur hierdie gewilligheid kan jy insien wat jy het. ⁸Wat jy gee, is daarom die waarde wat jy plaas op wat jy het, omdat dit die presiese maat is van die waarde wat jy daaraan heg. ⁹En dit is op sy beurt weer die maat van hoe graag jy dit wil hê.
12. Jy kan dus die Heilige Gees alleen iets vra deur Hom iets te gee, en jy kan Hom alleenlik iets gee waar jy Hom herken. ²As jy Hom in almal herken, dink net hoeveel jy van Hom sal vra en hoeveel jy dan sal ontvang. ³Hy sal jou niks ontsê nie omdat jy Hom niks ontsê het nie, en so kan julle alles deel. ⁴Dit is die manier, en die enigste manier om Sy antwoord te kry, want Sy antwoord is al waarvoor jy kan vra en wil hê. ⁵Sê dan vir een en almal:

⁶Omdat ek myself wil ken, sien ek jou as God se Seun en my broer.

III. Die korreksie van foute

1. Die wakkerheid van die ego vir die foute van ander ego’s is nie die soort waaksaamheid wat die Heilige Gees sou wil hê jy in stand moet hou nie. ²Ego’s is krities ten opsigte van die soort sogenaamde “sinvolheid” wat hulle voorstaan. ³Hulle begryp hierdie soort sin omdat dit vir hulle sinvol is. ⁴Vir die Heilige Gees het dit geen sin hoegenaamd nie.
2. Vir die ego is dit lief en reg en goed om foute uit te wys en hulle te “korrigeer”. ²Dit het volkome sin vir die ego wat nie weet wat foute is en wat korreksie is nie. ³Foute kom van die ego af, en korreksie van foute lê in die ongedaanmaking van die ego. ⁴Wanneer jy ’n broer korrigeer, sê jy vir hom dat hy verkeerd is. ⁵Hy mag op daardie oomblik miskien nie juis verstandig wees nie, en dit is in elk geval seker dat as hy vanuit die ego praat, hy nie verstandig sal wees nie. ⁶Maar jou taak is nog steeds om vir hom te sê dat hy reg is. ⁷Jy sê dit nie verbaal vir hom as hy onsin praat nie. ⁸Hy benodig die korreksie op ’n ander vlak omdat sy fout op ’n ander vlak lê. ⁹Hy is nog altyd reg omdat hy ’n Seun van God is. ¹⁰Sy ego is altyd verkeerd, ongeag wat hy sê of doen.
3. As jy op die foute van jou broers se ego wys, kyk jy beslis deur jou eie ego, want die Heilige Gees neem nie sy foute waar nie. ²Dit moet waar wees, aangesien daar geen kommunikasie is tussen die ego en die Heilige Gees nie. ³Die ego het geen sin nie, en die Heilige Gees probeer nie om enigiets te begryp wat daaruit voortkom nie. ⁴Aangesien Hy dit nie begryp nie, beoordeel Hy dit nie, want Hy weet dat niks wat die ego maak enigiets beteken nie.
4. Wanneer jy hoegenaamd op foute reageer, luister jy nie na die Heilige Gees nie. ²Hy het hulle bloot verontagsaam, en as jy daaraan aandag skenk, hoor jy Hom nie. ³As jy Hom nie hoor nie, luister jy na jou ego en het jy net so min sin as die broer wie se foute jy waarneem. ⁴Dit kan geen korreksie wees nie. ⁵Maar dit is meer as bloot ’n gebrek aan korreksie vir hóm. ⁶Dit is die opgee van korreksie in jouself.
5. Wanneer ’n broer hom kranksinnig gedra, kan jy hom slegs genees deur geestesgesondheid in hom te sien. ²As jy sy foute waarneem en hulle aanvaar, aanvaar jy ook joune. ³As jy joune aan die Heilige Gees wil oorgee, moet jy dit ook met syne doen. ⁴Tensy dit die enigste manier word waarop jy alle foute hanteer, kan jy nie begryp hoe alle foute ongedaan gemaak word nie. ⁵Wat is dit anders as om jou te vertel dat jy leer wat jy onderrig? ⁶Jou broer is so reg soos jy, en as jy dink hy is verkeerd, veroordeel jy jouself.
6. Jy kan nie jouself korrigeer nie. ²Kan jy dan ’n ander korrigeer? ³Maar jy kan hom in waarheid sien, want jy kan jouself in waarheid sien. ⁴Dit berus nie by jou om jou broer te verander nie, maar bloot om hom te aanvaar soos hy is. ⁵Sy foute spruit nie uit die waarheid wat in hom is nie, en alleen hierdie waarheid is joune. ⁶Sy foute kan dit nie verander nie, en kan geen effek hoegenaamd op die waarheid in jou hê nie. ⁷Om foute in iemand waar te neem, en daarop te reageer asof hulle werklik is, is om hulle vir jouself werklik te maak. ⁸Jy sal nie die betaling van die prys hiervoor vryspring nie, nie omdat jy daarvoor gestraf word nie, maar omdat jy die verkeerde gids volg en daarom die pad byster raak.
7. Jou broer se foute is ewemin van hom as wat joune van jou is. ²Aanvaar sy foute as werklik, en jy het jouself aangeval. ³As jy die pad wil vind en bly volg, sien dan alleenlik die waarheid as metgesel langs jou, want julle loop saam. ⁴Die Heilige Gees in jou vergewe alles in jou en in jou broer. ⁵Sy foute word saam met joune vergewe. ⁶Die Versoening is net so min geskei as wat die liefde geskei is. ⁷Die Versoening kan nie geskei wees nie, omdat dit uit liefde voortkom. ⁸Enige poging wat jy aanwend om ’n broer te korrigeer, beteken dat jy glo dat korreksie deur jou moontlik is, en dit kan alleen die arrogansie van die ego wees. ⁹Korreksie is van God Wat nie van arrogansie weet nie.
8. Die Heilige Gees vergewe alles omdat God alles geskep het. ²Moenie Sy funksie oorneem nie, of jy sal joune vergeet. ³Aanvaar alleen die funksie van genesing binne tyd, want dit is waarvoor tyd daar is. ⁴God het jou die funksie gegee om in ewigheid te skep. ⁵Jy hoef dit nie te leer nie, maar jy moet leer om dit te wil hê. ⁶Daarvoor is alle leer gemaak. ⁷Dit is die Heilige Gees se gebruik van ’n vermoë wat jy nie nodig het nie, maar wat jy gemaak het. ⁸Gee dit vir Hom! ⁹Jy begryp nie hoe om dit te gebruik nie. ¹⁰Hy sal jou leer hoe om jouself sonder veroordeling te sien, deur te leer hoe om sonder oordeel na alles te kyk. ¹¹Veroordeling sal dan nie vir jou werklikheid wees nie, en al jou foute sal vergewe wees. 

IV. Die Heilige Gees se plan van vergifnis

1. Versoening is vir almal, want dit is die manier om die geloofsoortuiging dat daar dinge is wat vir jou alleen bestaan, ongedaan te maak. ²Om te vergewe, beteken om verby iets te kyk. ³Kyk dan by die fout verby en laat jou persepsie nie daarop rus nie, want wat in jou persepsie beslag kry, sal jy glo. ⁴Aanvaar maar net wat jou broer is as waar, as jy jouself wil ken. ⁵As jy waarneem wat hy nie is nie, kan jy nie weet wat jy is nie, omdat jy hom verkeerd sien. ⁶Onthou altyd dat julle Identiteit gedeel word en dat die deling van Identiteit niks anders is nie as Sy werklikheid. 
2. Jy het ’n rol om in die Versoening te speel, maar die plan van die Versoening gaan jou te bowe. ²Jy begryp nie hoe om verby foute te kyk nie, anders sou jy hulle nie begaan het nie. ³Dit sou bloot ’n verdere fout wees om te glo dat jy hulle nie begaan nie, of dat jy hulle kan korrigeer sonder ’n Gids vir korreksie. ⁴En as jy nie hierdie Gids volg nie, sal jou foute nie gekorrigeer word nie. ⁵Die plan is nie joune nie vanweë jou beperkte idees oor wat jy is. ⁶Hierdie gevoel van beperking is die oorsprong van alle foute. ⁷Die manier om hulle ongedaan te maak, is daarom nie van jou nie, maar vir jou.
3. Die Versoening is ’n les in met mekaar deel, en dit word vir jou gegee omdat jy vergeet het hoe om dit te doen. ²Die Heilige Gees herinner jou bloot aan die natuurlike gebruik van jou vermoëns. ³Deur die vermoë om aan te val te herinterpreteer tot die vermoë om te deel, sit Hy dit wat jy gemaak het om in wat God geskep het. ⁴As jy dit deur Hom wil volbring, kan jy nie na jou vermoëns deur die oë van die ego kyk nie, of jy sal hulle oordeel soos hy dit doen. ⁵Al die skadelikheid daarvan lê in die oordeel van die ego. ⁶Al die nut daarvan lê in die oordeel van die Heilige Gees.
4. Die ego het ook ’n vergewingsplan omdat jy vir een vra, ofskoon nie van die regte onderwyser nie. ²Die ego se plan het natuurlik geen sin nie, en sal nie werk nie. ³Deur sy plan te volg, sal jy jou bloot in ’n onmoontlike situasie plaas waarheen die ego jou altyd lei. ⁴Die ego se plan is om jou die fout eers duidelik te laat sien, en dit dan oor die hoof te sien. ⁵Maar hoe kan jy iets oor die hoof sien wat jy werklikheid gemaak het? ⁶Deur dit duidelik te sien, het jy dit werklikheid gemaak en kan nie daar verby kyk nie. ⁷Dit is hier waar die ego genoodsaak word om sy toevlug te neem tot sogenaamde “misteries”, en daarop aandring dat jy die betekenislose moet aanvaar om jouself te red. ⁸Baie het probeer om dit te doen in my naam, maar vergeet dat my woorde alleen volkome sin het omdat hulle van God kom. ⁹Hulle is nou nog net so verstandig as wat hulle ooit was, want hulle praat van idees wat ewig is.
5. Vergifnis wat van my geleer word, gebruik nie vrees om vrees ongedaan te maak nie. ²Ook maak dit nie die werklike onwerklik en vernietig dit dan nie. ³Vergifnis deur die Heilige Gees impliseer eenvoudig om van die begin af verby die fout te kyk, sodat dit vir jou onwerklik bly. ⁴Laat geen enkele oortuiging oor die egtheid daarvan jou geestesdenke binnekom nie, of jy sal eweneens glo dat jy ongedaan moet maak wat jy gemaak het ten einde vergewe te word. ⁵Wat geen gevolg het nie, bestaan nie, en vir die Heilige Gees bestaan die gevolge van ’n fout nie. ⁶Deur oral en in alle opsigte voortdurend en konsekwent al die gevolge daarvan te kanselleer, onderrig en bewys Hy dat die ego nie bestaan nie.
6. Volg dan die Heilige Gees se onderrig in vergifnis, want vergifnis is Sy funksie en Hy weet hoe om dit volmaak te vervul. ²Dit is wat ek bedoel het toe ek gesê het dat wonders natuurlik is, en wanneer hulle nie voorkom nie, iets verkeerd geloop het. ³Wonders is bloot die teken van jou gewilligheid om die Heilige Gees se verlossingsplan  te volg in die erkenning dat jy nie begryp wat dit is nie. ⁴Sy werk is nie jou funksie nie, en tensy jy dit aanvaar, kan jy nie leer wat jou funksie is nie.
7. Die verwarring van funksies is so tipies van die ego dat jy teen dié tyd al heel vertroud daarmee moet wees. ²Die ego glo dat alle funksies aan hom behoort, selfs al het hy geen idee wat hulle is nie. ³Dit is meer as blote verwarring. ⁴Dit is ’n besonder gevaarlike kombinasie van grootheidswaan en verwarring wat dit waarskynlik maak dat die ego alles en almal sonder die minste rede aanval. ⁵Dit is presies wat die ego doen. ⁶Hy is onvoorspelbaar in sy reaksies omdat hy geen idee het wat hy waarneem nie.
8. As jy geen idee het wat gebeur nie, hoe toepaslik kan jy verwag om te reageer? ²Jy sou jouself kon afvra, ongeag hoe jy van die reaksie rekenskap gee, of die ego vanweë sy onvoorspelbaarheid wel in die juiste posisie is om as jou gids te dien. ³Laat ek herhaal dat die ego se kwalifikasies as ’n gids buitengewoon ongelukkig is en dat hy ’n merkwaardige swak keuse as onderwyser van verlossing is. ⁴Wie ook al ’n totaal kranksinnige gids uitkies, moet self totaal kranksinnig wees. ⁵Ook is dit nie waar dat jy nie besef dat die gids kranksinnig is nie. ⁶Jy besef dit, want ek besef dit, en jy het dit volgens dieselfde maatstaf as ek beoordeel.
9. Die ego leef letterlik op geleende tyd en sy dae is getel. ²Moenie bang wees vir die Laaste Oordeel nie, maar verwelkom dit en moenie wag nie, want die ego se tyd is van jou ewigheid “geleen”. ³Dit is die Wederkoms wat vir jou gemaak is soos die Eerste Koms geskep was. ⁴Die Wederkoms is bloot die terugkeer van gesonde verstand. ⁵Kan dit enigsins vreesaanjaend wees?
10. Wat anders as fantasie kan vreesaanjaend wees, en wie wend hom tot fantasie tensy hy daaraan wanhoop om voldoening in die werklikheid te vind? ²Maar dit staan vas dat jy nooit voldoening in fantasie sal vind nie, sodat jou enigste hoop daarin lê om jou geestesdenke oor die werklikheid te verander. ³God kan alleen reg wees as die besluit dat die werklikheid vreesaanjaend is, verkeerd is. ⁴En ek verseker jou dat God reg is. ⁵Wees dan bly dat jy verkeerd was, maar dit was slegs omdat jy nie geweet het wie jy was nie. ⁶As jy dit maar geweet het, sou jy ewemin verkeerd kon wees as God.
11. Die onmoontlike kan slegs in ’n fantasie geskied. ²As jy die werklikheid in fantasieë soek, sal jy dit nie vind nie. ³Die simbole van ’n fantasie kom van die ego, en daarvan sal jy vele vind. ⁴Maar moenie vir betekenis in hulle soek nie. ⁵Hulle beskik oor ewe min betekenis as die fantasieë waarin hulle verweef is. ⁶Sprokies kan aangenaam of angswekkend wees, maar niemand sê hulle is waar nie. ⁷Kinders glo hulle miskien, en dus is die verhale vir hulle ’n tydjie waar. ⁸Maar as die werklikheid deurbreek, is fantasieë weg. ⁹Die werklikheid het nie verdwyn nie. ¹⁰Die Wederkoms is die bewuswording van die werklikheid, nie die terugkeer daarvan nie.
12. Kyk my kind, die werklikheid is hier. ²Dit behoort aan jou en my en God, en skenk aan almal van Ons volmaakte voldoening. ³Slegs hierdie bewustheid genees, want dit is die bewussyn van die waarheid.

V. Die ongeneesde geneser

1. Die ego se vergewingsplan word veel meer gebruik as dié van God. ²Dit is omdat dit deur ongeneesde genesers aangepak word, en daarom van die ego is. ³Laat ons die ongeneesde geneser nou sorgvuldiger in oënskou neem. ⁴Per definisie probeer hy om te gee wat hy nie ontvang het nie. ⁵As die ongeneesde geneser byvoorbeeld ’n teoloog is, gaan hy miskien van dié veronderstelling uit: “Ek is ’n ellendige sondaar, en so is jy dus ook.” ⁶As hy ’n psigoterapeut is, sal hy waarskynlik eerder met die ewe ongeloofwaardige oortuiging begin dat aanval vir sowel homself as die pasiënt werklikheid is, maar dat dit nie vir een van hulle saak maak nie.
2. Ek het herhaaldelik gesê dat geloofsoortuigings van die ego nie gedeel kan word nie, en dit is die rede waarom hulle onwerklik is. ²Hoe kan hulle dan werklik gemaak word as hulle juis aan die kaak gestel word? ³Enige geneser wat in fantasieë die waarheid soek, is beslis nie genees nie, want hy weet nie waar om na die waarheid te soek nie, en beskik dus nie oor die antwoord op die probleem van genesing nie.
3. Om bewus te maak van nagmerries het ’n voordeel, maar slegs om te onderrig dat hulle nie werklik is nie, en dat alles wat hulle bevat geen betekenis het nie. ²Die ongeneesde geneser kan dit nie doen nie, want hy glo dit nie. ³Alle ongeneesde genesers volg die ego se vergewingsplan in een of ander vorm. ⁴As hulle teoloë is, sal hulle hulleself waarskynlik veroordeel, veroordeling onderrig en ’n oplossing wat bang maak voorstaan. ⁵Deur veroordeling op God te projekteer, laat hulle Hom wraaksugtig lyk, en vrees hulle Sy vergelding. ⁶Maar wat hulle gedoen het, is om met die ego te identifiseer, en deur waar te neem wat dit doen, hulleself op grond van hierdie verwarring te veroordeel. ⁷Dit is verstaanbaar dat daar opstand en verset teen hierdie konsep ontstaan het, maar om jou daarteen te verset, beteken nog steeds om daarin te glo.
4. Sommige nuwe vorme van die ego se plan is ewe nutteloos as die oues, omdat die vorm geen verskil maak nie en die inhoud nie verander het nie. ²In een van die nuwer vorme mag ’n psigoterapeut byvoorbeeld die ego se simbole in ’n nagmerrie interpreteer, en hulle dan gebruik om te bewys dat die nagmerrie werklikheid is. ³Sodra dit eers werklik gemaak is, probeer hy dan om die gevolge daarvan uit te wis  deur die belangrikheid van die dromer gering te skat. ⁴Dit sou ’n heilsame benadering wees as die dromer ook as onwerklik gesien kon word. ⁵Maar as die dromer gelykgestel word met die geestesdenke, word die korrigerende vermoë van die geestesdenke wat werk deur die Heilige Gees, ontken. ⁶Dit is selfs vanuit die ego se oogpunt ’n weerspreking, en wel een wat hy gewoonlik selfs in sy verwarring raaksien.
5. As die manier om vrees teen te werk, beteken dat die belangrikheid van die geestesdenke verminder moet word, hoe kan dit dan egosterkte opbou? ²Sulke duidelike teenstrydighede verklaar waarom niemand nog waarlik verduidelik het wat in psigoterapie gebeur nie. ³Daar gebeur in werklikheid niks nie. ⁴Daar het met die ongeneesde geneser niks werkliks gebeur nie, en hy moet leer uit sy eie onderrig. ⁵Sy ego sal altyd probeer om iets uit die situasie te haal. ⁶Die ongeneesde geneser weet dus nie hoe om te gee nie, en kan gevolglik nie deel nie. ⁷Hy kan nie korrigeer nie, want hy werk nie korrigerend nie. ⁸Hy glo dat dit by hom berus om die pasiënt te leer wat werklik is, alhoewel hy dit self nie weet nie.
6. Wat behoort dan te gebeur? ²Toe God gesê het: “Laat daar lig wees,” was daar lig. ³Kan jy lig vind deur die duisternis te analiseer, soos die psigoterapeut dit doen, of soos die teoloog, deur duisternis in jouself te erken en na ’n veraf lig te soek om die duisternis uit te wis, terwyl die afstand beklemtoon word? ⁴Genesing is nie misterieus nie. ⁵Niks sal verander wat nie begryp word nie, want lig is begrip. ⁶’n “Ellendige sondaar” kan nie sonder die magiese genees word nie, net so min as wat ’n  “onbelangrike geestesdenke” homself kan respekteer sonder die magiese.
7. Beide vorme van die ego se benadering moet dus ’n doodloopstraat bereik, die tipiese  “onmoontlike situasie” waartoe die ego altyd aanleiding gee. ²Dit mag help om iemand te wys in watter rigting hy stuur, maar die doel daarvan gaan verlore as hy nie ook gehelp word om van rigting te verander nie. ³Die ongeneesde geneser kan dit nie vir hom doen nie, omdat hy dit nie vir homself kan doen nie. ⁴Die enigste betekenisvolle bydrae wat die geneser kan maak, is om ’n voorbeeld te wees van iemand wie se rigting vir hom verander is, en wat nie langer in enige soort nagmerries glo nie. ⁵Die lig in sy geestesdenke sal daarom antwoord gee aan die vraesteller, wat met God moet besluit dat daar lig is omdat hy dit sien. ⁶En deur sy erkenning weet die geneser dat dit daar is. ⁷Dit is hoe persepsie uiteindelik in kennis omgesit word. ⁸Die wonderdoener begin deur lig waar te neem, en sit sy persepsie om in sekerheid deur dit voortdurend uit te brei en die erkenning daarvan te aanvaar. ⁹Die gevolge daarvan verseker hom dat dit daar is.
8. ’n Terapeut genees nie, hy laat genesing plaasvind. ²Hy kan op die duisternis wys, maar vanself kan hy nie lig bring nie, want die lig is nie van hom nie. ³Maar omdat dit wel vir hom daar is, moet dit ook vir sy pasiënt daar wees. ⁴Die Heilige Gees is die enigste Terapeut. ⁵Hy maak genesing in enige situasie duidelik waarin Hy die Gids is. ⁶Jy kan Hom maar net Sy funksie laat vervul. ⁷Hiervoor het Hy geen hulp nodig nie. ⁸Hy sal jou presies vertel wat om te doen om iemand te help wat Hy na jou vir hulp stuur, en sal deur jou met hom praat as jy nie inmeng nie. ⁹Onthou dat jy die gids kies om te help, en dat die verkeerde keuse nie sal help nie. ¹⁰Maar onthou ook dat die regte een sal help. ¹¹Vertrou Hom, want om te help is Sy funksie, en Hy is van God. ¹²Soos jy ander se geestesdenke wakker maak tot die Heilige Gees deur Hom, en nie deur jouself nie, sal jy begryp dat jy nie die wette van hierdie wêreld gehoorsaam nie. ¹³Maar die wette wat jy gehoorsaam, werk. ¹⁴“Dit is die goeie wat werk” is ’n gesonde, maar onvoldoende stelling. ¹⁵Alleen die goeie kan werk. ¹⁶Niks anders werk hoegenaamd nie.
9. Hierdie kursus bied ’n baie direkte en ’n heel eenvoudige leersituasie aan, en verskaf die Gids wat jou vertel wat om te doen. ²As jy dit doen, sal jy sien dat dit werk. ³Die resultate daarvan is meer oortuigend as die woorde. ⁴Hulle sal jou daarvan oortuig dat die woorde waar is. ⁵Deur die regte Gids te volg, sal jy die eenvoudigste van alle lesse leer:

⁶Aan hulle vrugte sal julle hulle ken, en sal hulle hulleself ken.

VI. Die aanvaarding van jou broer

1. Hoe kan jy in toenemende mate van die Heilige Gees in jou bewus word anders as deur Sy werking? ²Jy kan Hom nie met jou oë sien of met jou ore hoor nie. ³Hoe kan jy Hom dan hoegenaamd waarneem? ⁴As jy vreugde inspireer en ander reageer op jou met vreugde, selfs al ervaar jy nie self vreugde nie, moet daar iets in jou wees wat in staat is om dit op te wek. ⁵As dit in jou is en vreugde kan opwek, en as jy sien dat dit inderdaad vreugde in ander opwek, dan is jy besig om dit in jouself te dissosieer.
2. Dit kom vir jou voor of die Heilige Gees nie konsekwent vreugde in jou opwek nie omdat jy nie konsekwent vreugde in ander wakker maak nie. ²Aan hulle reaksies op jou evalueer jy hoe konsekwent Hy is. ³As jy inkonsekwent is, sal jy nie altyd aanleiding gee tot vreugde nie, en sodoende sal jy nie altyd Sy konsekwentheid herken nie. ⁴Wat jy jou broer aangebied het, bied jy Hom aan, want Hy kan nie in wat Hy gee verder gaan as wat jy aangebied het nie. ⁵Dit is nie omdat Hy beperk wat Hy gee nie, maar eenvoudig omdat jy beperk het wat jy ontvang het. ⁶Die besluit om te ontvang, is die besluit om te aanvaar.
3. As jou broers deel van jou is, gaan jy hulle dan aanvaar? ²Net hulle kan jou leer  wat jy is, want wat jy leer, is die resultaat van wat jy hulle geleer het. ³Wat jy oproep in hulle, roep jy in jouself op. ⁴En soos jy dit in hulle oproep, word dit in jou werklikheid. ⁵God het maar een Seun, want Hy ken hulle almal as één. ⁶Alleenlik God Self is meer as hulle, maar hulle is nie minder as Hy nie. ⁷Wil jy weet wat dit beteken? ⁸As jy wat jy aan my broer doen aan my doen, en as jy alles vir jouself doen omdat ons deel van jou is, dan behoort alles wat ons doen eweneens aan jou. ⁹Iedereen wat God geskep het, is deel van jou en deel Sy heerlikheid met jou. ¹⁰Sy heerlikheid  behoort aan Hom, maar is in gelyke mate joune. ¹¹Jy kan dus nie minder heerlik wees as Hy nie.
4. God is alleenlik meer as jy omdat Hy jou geskep het, maar selfs dit wil Hy nie van jou weerhou nie. ²Daarom kan jy skep soos Hy geskep het, en jou dissosiasie sal dit nie verander nie. ³Nóg God se lig, nóg joune is verdof omdat jy nie kan sien nie. ⁴Omdat die Seunskap as één moet skep, onthou jy die skepping elke keer as jy ’n deel van die skepping herken. ⁵Elke deel wat jy onthou, voeg tot jou heelheid by, want elke deel is heel. ⁶Heelheid is ondeelbaar, maar jy kan nie leer wat jou heelheid is voordat jy dit nie oral sien nie. ⁷Jy kan jouself alleenlik ken soos God Sy Seun ken, want kennis word met God gedeel. ⁸Wanneer jy in Hom ontwaak, sal jy jou grootheid ken deur Sy grensloosheid as joune te aanvaar. ⁹Maar intussen sal jy jou grootheid  beoordeel soos jy jou broer s’n oordeel, en dit aanvaar soos jy syne aanvaar.
5. Jy is nog nie wakker nie, maar jy kan leer hoe om te ontwaak. ²Baie eenvoudig: die Heilige Gees leer jou om ander wakker te maak. ³Namate jy hulle sien ontwaak, sal jy leer wat ontwaking beteken, en omdat jy gekies het om hulle wakker te maak, sal hulle dankbaarheid en waardering oor wat jy hulle gegee het, jou leer wat die waarde daarvan is. ⁴Hulle sal die getuies van jou werklikheid word, net soos jy geskep was as getuie van die Werklikheid van God. ⁵Maar wanneer die Seunskap bymekaarkom en sy Éénheid aanvaar, sal hy geken word aan sy skeppinge wat getuig van sy werklikheid soos die Seun dit doen vir die Vader.
6. Wonders het nie ’n plek in die ewigheid nie, omdat hulle herstellend is. ²Maar solank jy nog genesing nodig het, is jou wonders die enigste getuies van jou werklikheid wat jy kan herken. ³Jy kan nie ’n wonder vir jouself verrig nie, want wonders is ’n manier om aanvaarding te gee en te ontvang. ⁴In tyd kom die gee eerste, alhoewel hulle in die ewigheid, waar hulle nie geskei kan word nie, gelyktydig is. ⁵Wanneer jy geleer het dat hulle dieselfde is, is die behoefte aan tyd verby.
7. Die ewigheid is één tyd, met “altyd” as enigste dimensie. ²Dit kan niks vir jou beteken totdat jy nie God se ope Arms onthou, en uiteindelik Sy oop Geestesdenke ken nie. ³Soos Hy, is jy “altyd”: in Sy Geestesdenke en met dieselfde geestesdenke as Syne. ⁴In jou oop geestesdenke is jou skeppinge, in volmaakte kommunikasie gebore uit volmaakte begrip. ⁵Sou jy maar een van hulle kon aanvaar, sou jy niks wou hê wat die wêreld aan te bied het nie. ⁶Alles anders sou totaal betekenisloos wees. ⁷God se betekenis is onvolledig sonder jou, en jy is onvolledig sonder jou skeppinge. ⁸Aanvaar jou broer in hierdie wêreld en aanvaar niks anders nie, want in hom sal jy jou skeppinge vind, omdat hy hulle met jou geskep het. ⁹Jy sal nooit weet dat jy medeskepper met God is tot jy nie leer dat jou broer medeskepper met jou is nie.

VII. Die twee evaluerings

1. God se Wil is jou verlossing. ²Sou Hy jou dan nie die middele gee om dit te vind nie? ³As Hy wil dat jy dit ontvang, moes Hy dit moontlik en maklik gemaak het om te bekom. ⁴Jou broers is oral. ⁵Jy hoef nie ver vir verlossing te soek nie. ⁶Elke minuut en elke sekonde bied jou ’n kans om jouself te verlos. ⁷Moenie hierdie kanse verspeel nie, nie omdat hulle nie sal terugkeer nie, maar omdat ’n vertraging van vreugde onnodig is. ⁸God wil nou vir jou volmaakte geluk. ⁹Is dit moontlik dat dit nie ook jou wil is nie? ¹⁰En is dit moontlik dat dit nie ook die wil van jou broers is nie?
2. Oorweeg dan dat julle almal in hierdie gesamentlike wil, en hierin alleen, verenig is. ²Daar kan verskil word oor enigiets anders, maar nie hieroor nie. ³Hierin lê dan ook die vrede. ⁴En jy bly in vrede wanneer jy so besluit. ⁵Maar jy kan nie in vrede bly nie, tensy jy die Versoening aanvaar nie, want die Versoening is die weg na vrede. ⁶Die rede is baie eenvoudig, en so vanselfsprekend dat dit dikwels nie raakgesien word nie. ⁷Die ego is bang vir wat vanselfsprekend is, want die vanselfsprekende is die wesenlike kenmerk van die werklikheid. ⁸Maar jy kan nie daar verby kyk nie, tensy jy nie kyk nie.
3. Dit is volkome vanselfsprekend dat as die Heilige Gees alles wat Hy waarneem met liefde aanskou, Hy jou ook met liefde aanskou. ²Sy evaluering of beoordeling van jou is gebaseer op Sy kennis van wat jy is, en so beoordeel Hy jou in waarheid. ³En hierdie evaluering moet in jou geestesdenke wees, want Hy is daar. ⁴Die ego is ook in jou geestesdenke, omdat jy Hom daar toegelaat het. ⁵Sy evaluering van jou is egter presies die teenoorgestelde van die Heilige Gees s’n, omdat die ego jou nie lief het nie. ⁶Hy is nie bewus van wat jy is nie, en heeltemal wantrouig teenoor alles wat hy waarneem omdat sy persepsies so wisselend is. ⁷Die ego is dan ook op sy beste tot agterdogtigheid en op sy ergste tot boosaardigheid in staat. ⁸Dit is sy grense. ⁹Daarbuite kan hy nie gaan nie vanweë sy onsekerheid. ¹⁰En daarbowe kan hy nie kom nie, omdat hy nooit seker kan wees nie.
4. Jy het dus twee konflikterende evaluerings van jouself in jou geestesdenke, en hulle kan nie beide waar wees nie. ²Jy besef nog nie hoe totaal verskillend hierdie beoordelings is nie, want jy begryp nie hoe verhewe die Heilige Gees se persepsies van jou in werklikheid is nie. ³Hy word nie mislei deur enigiets wat jy doen nie omdat Hy nooit vergeet wat jy is nie. ⁴Die ego word mislei deur alles wat jy doen, veral wanneer jy op die Heilige Gees reageer, want met sulke tye neem sy verwarring toe. ⁵Die ego sal jou dus hoogswaarskynlik aanval wanneer jy liefdevol reageer, want hy het jou as nie-liefdevol geëvalueer en jy gaan teen sy oordeel in. ⁶Die ego sal jou motiewe aanval sodra hulle duidelik nie meer ooreenstem met sy persepsie van jou nie. ⁷Dit is wanneer hy bruusk sal verander van agterdogtigheid tot boosaardigheid, aangesien sy onsekerheid toegeneem het. ⁸Tog is dit sinloos om terug aan te val. ⁹Wat kan dit anders beteken as dat jy saamstem met die ego se evaluering van wat jy is?
5. As jy verkies om jouself nie as liefdevol te sien nie, sal jy nie gelukkig wees nie. ²Jy veroordeel jouself en moet jouself gevolglik as ontoereikend beskou. ³Sou jy na die ego opsien om jou te help om van ’n gevoel van ontoereikendheid, wat hy teweeggebring het en vir sy voortbestaan in stand moet hou, ontslae te raak?  ⁴Kan jy sy evaluering van jou vryspring deur gebruik te maak van sy metodes om hierdie prentjie ongeskonde te hou?
6. Jy kan nie ’n kranksinnige geloofsisteem van binne evalueer nie. ²Sy bestek of bereik sluit dit uit. ³Jy kan alleenlik daarbuite gaan staan, en vanaf ’n punt waar geestesgesondheid bestaan, terugkyk, en die kontras sien. ⁴Slegs deur hierdie kontras kan kranksinnigheid as kranksinnig geoordeel word. ⁵Met die grootheid van God in jou het jy verkies om klein te wees en om jou kleinheid te betreur. ⁶Binne die sisteem wat hierdie keuse bepaal het, is die klaaglied onvermydelik. ⁷Jou kleinheid word daar as vanselfsprekend aanvaar en jy vra nie: “Wie het dit my geskenk?” nie. ⁸Die vraag is binne die ego se denksisteem betekenisloos, want dit sou die hele denksisteem aan bevraagtekening blootstel.
7. Ek het gesê dat die ego nie weet wat ’n egte vraag is nie. ²Enige soort gebrek aan kennis hou altyd verband met ’n onwilligheid om te ken, en dit veroorsaak ’n totale gebrek aan kennis, eenvoudig omdat kennis totaal is. ³Om nie jou kleinheid in twyfel te trek nie, beteken dus om alle kennis te ontken, en die ego se hele denksisteem ongeskonde te hou. ⁴Jy kan nie ’n denksisteem gedeeltelik behou nie, omdat dit slegs  by sy fondament in twyfel getrek kan word. ⁵En dit moet van buite in twyfel getrek word, want daarbinne bly sy fondament inderdaad van krag. ⁶Die Heilige Gees oordeel teen die werklikheid van die ego se denksisteem bloot omdat Hy weet dat sy fondament nie waar is nie. ⁷Daarom beteken niks wat daaruit voortkom enigiets nie. ⁸Hy oordeel elke oortuiging wat jy het in terme van waar dit vandaan kom. ⁹As dit van God af kom, weet Hy dat dit waar is. ¹⁰Indien nie, weet Hy dat dit sonder betekenis is.
8. Elke keer as jy jou waarde in twyfel trek, sê dan:

²God Self is onvolledig sonder my.

³Onthou dit wanneer die ego praat, en jy sal hom nie hoor nie. ⁴Die waarheid oor jou is so verhewe dat niks wat God onwaardig is, jou waardig is nie. ⁵Besluit dan wat jy in terme hiervan wil hê, en aanvaar niks wat jy nie aan God sou wil bied wat Hom nie volkome gepas is nie. ⁶Jy wil niks anders hê nie. ⁷Gee Hom jou deel terug, en Hy sal jou alles van Homself gee in ruil vir dit wat aan Hom behoort en Hom volledig maak.

VIII. Grootheid teenoor grootheidswaan

1. Grootheid is van God, en van Hom alleen. ²Daarom is dit in jou. ³Elke keer as jy daarvan bewus word, hoe vaagweg ook al, doen jy outomaties afstand van die ego, want in die teenwoordigheid van die grootheid van God word die onbeduidenheid van die ego volkome duidelik. ⁴Wanneer dit gebeur, alhoewel hy dit nie begryp nie, glo die ego dat sy “vyand” toegeslaan het, en probeer hy jou met geskenke oorhaal om na sy “beskerming” terug te keer. ⁵’n Opgeblase self is die enigste aanbod wat die ego kan maak. ⁶Die grootheidswaan van die ego is sy alternatief vir die grootheid van God. ⁷Watter een kies jy?
2. Grootheidswaan is altyd ’n dekmantel vir wanhoop. ²Dit is sonder hoop omdat dit nie werklik is nie. ³Dit is ’n poging om jou kleinheid teen te werk, gegrond op die oortuiging dat die kleinheid werklik is. ⁴Sonder hierdie oortuiging het grootheidswaan geen betekenis nie, en is dit onmoontlik dat jy dit sou wil hê. ⁵Die essensie van grootheidswaan is mededingendheid, want dit behels altyd aanval. ⁶Dit is ’n waandenkbeeldige poging om te oortref, maar nie ’n poging om ongedaan te maak nie. ⁷Ons het voorheen gesê dat die ego tussen agterdogtigheid en boosaardigheid weifel. ⁸Hy bly agterdogtig solank jy aan jouself wanhoop. ⁹Hy verander na boosaardigheid wanneer jy besluit om nie selfvernedering te duld nie, en uitkoms te soek. ¹⁰Dan bied hy jou die illusie van aanval as ’n “oplossing” aan.
3. Die ego begryp nie die verskil tussen grootheid en grootheidswaan nie, want hy sien geen verskil tussen wonderimpulse en sy eie egovreemde oortuigings nie. ²Ek het jou vertel dat die ego bewus is van die bedreiging vir sy bestaan, maar hy maak geen onderskeid tussen hierdie twee baie verskillende soorte bedreigings nie. ³Sy diepe gevoel van kwetsbaarheid maak dat hy nie in staat is om iets te oordeel, behalwe as aanval nie. ⁴Wanneer die ego bedreiging ervaar, is sy enigste besluit of hy nou sal aanval of hom eers terug sal trek om later aan te val. ⁵As jy sy aanbod van grootheidswaan aanvaar, sal hy onmiddellik aanval. ⁶Indien nie, sal hy wag.
4. In die teenwoordigheid van God se grootheid is die ego geïmmobiliseer, want Sy grootheid bevestig jou vryheid. ²Selfs die geringste sweempie van jou werklikheid dryf die ego letterlik uit jou geestesdenke, want jy sal alle belegging daarin opgee. ³Grootheid is geheel en al sonder illusies, en omdat dit werklik is, is dit dwingend oortuigend. ⁴Maar jy sal die oortuiging van die werklikheid nie kan handhaaf nie, tensy jy die ego verhinder om dit aan te val. ⁵Die ego sal alle moontlike pogings aanwend om te herstel en sy kragte teen jou bevryding te mobiliseer. ⁶Hy sal jou vertel dat jy kranksinnig is, en argumenteer dat grootheid nie ’n werklike deel van jou kan wees nie vanweë die kleinheid waarin hy glo. ⁷Nogtans is jou grootheid geen waan nie, want jy het dit nie gemaak nie. ⁸Jy het wel grootheidswaan gemaak en jy is bang daarvoor omdat dit ’n vorm van aanval is, maar jou grootheid is van God, wat dit uit Sy Liefde geskep het.
5. Vanuit jou grootheid kan jy alleenlik seën, want jou grootheid is jou oorvloed. ²Deur te seën, hou jy dit in jou geestesdenke, beskerm dit teen illusies en hou jy jouself in die Geestesdenke van God. ³Onthou altyd dat jy nêrens anders kan wees as in die Geestesdenke van God nie. ⁴As jy dit vergeet, sal jy wanhoop en sal jy aanval.
6. Die ego maak uitsluitlik staat op jou gewilligheid om hom te verdra. ²As jy gewillig is om jou grootheid te aanskou, kan jy nie wanhoop nie, en dus kan jy nie die ego wil hê nie. ³Jou grootheid is God se antwoord op die ego, want dit is waar. ⁴Kleinheid en grootheid kan nie saambestaan nie, en ook is dit nie vir hulle moontlik om af te wissel nie. ⁵Kleinheid en grootheidswaan kan en moet mekaar afwissel, aangesien beide onwaar is en daarom op dieselfde vlak lê. ⁶Aangesien dit die vlak van wisseling is, word dit wisselvallig ervaar en is uiterstes die wesenlike eienskap daarvan.
7. Waarheid en kleinheid is ontkennings van mekaar, want grootheid is waarheid. ²Waarheid wissel en weifel nie, dit is altyd waar. ³Wanneer grootheid van jou wegglip, het jy dit vervang met iets wat jy gemaak het. ⁴Miskien is dit die geloof in kleinheid, miskien is dit die geloof in grootheidswaan. ⁵Maar dit moet waansinnig wees omdat dit nie waar is nie. ⁶Jou grootheid sal jou nooit mislei nie, maar jou illusies sal altyd. ⁷Illusies is bedrog. ⁸Jy kan nie triomfeer nie, maar jy is reeds verheerlik. ⁹In jou verheerlikte staat soek jy ander soos jy en verheug jou met hulle.
8. Dit is maklik om grootheid van grootheidswaan te onderskei, want liefde word beantwoord en hoogmoed nie. ²Hoogmoed sal nie wonders voortbring nie, en sal jou daarom van die ware getuies van jou werklikheid beroof. ³Die waarheid is nie duister of verborge nie, maar sy vanselfsprekendheid lê in die vreugde wat jy bring aan sy getuies, hulle wat dit vir jou wys. ⁴Hulle getuig van jou grootheid, maar hulle kan nie van hoogmoed getuig nie, want hoogmoed word nie gedeel nie. ⁵God wil hê dat jy aanskou wat Hy geskep het, omdat dit Sy vreugde is.  
9. Kan jou grootheid arrogant wees as God Self daarvan getuig? ²En wat kan werklik wees wat nie getuies het nie? ³Wat goeds kan daaruit kom? ⁴En as niks goeds daaruit  kom nie, kan die Heilige Gees dit nie gebruik nie. ⁵Wat Hy nie tot die Wil van God kan transformeer nie, bestaan hoegenaamd nie. ⁶Grootheidswaan is waandenkbeeldig omdat dit gebruik word om jou grootheid te vervang. ⁷Maar wat God geskep het, kan nie vervang word nie. ⁸God is sonder jou onvolledig, want Sy grootheid is totaal, en jy kan nie daaraan ontbreek nie.
10. Jy is geheel en al onvervangbaar in die Geestesdenke van God. ²Niemand anders kan jou rol daarin vervul nie, en solank jy jou rol onvervuld laat, wag jou ewige plek bloot op jou terugkeer. ³God, deur Sy Stem, herinner jou daaraan, en God Self hou jou uitbreidings daarin veilig. ⁴Maar jy ken hulle nie totdat jy nie na hulle terugkeer nie. ⁵Jy kan nie die Koninkryk vervang nie, en jy kan nie jouself vervang nie. ⁶God, wat jou waarde ken, wil dit nie so hê nie, en dus is dit nie so nie. ⁷Jou waarde is in God se Geestesdenke, en daarom nie in joune alleen nie. ⁸Om jouself te aanvaar soos God jou geskep het, kan nie arrogansie wees nie, want dit is die ontkenning van arrogansie. ⁹Om jou kleinheid te aanvaar, is arrogant, want dit beteken dat jy glo dat jou evaluering van jouself waarder as dié van God is.
11.       Maar as die waarheid ondeelbaar is, moet jou evaluering van jouself wees soos dié van God. ²Jy het nie jou waarde bepaal nie en dit benodig nie verdediging nie. ³Niks kan dit aanval of daaroor seëvier nie. ⁴Dit wissel nie. ⁵Jou waarde is maar net. ⁶Vra die Heilige Gees wat jou waarde is en Hy sal jou vertel, maar moenie vir Sy antwoord bang wees nie, want dit kom van God. ⁷Dit is ’n verheerlikte antwoord vanweë die  Bron, maar die Bron is waar en so ook Sy antwoord. ⁸Luister en moenie wat jy hoor,  bevraagteken nie, want God mislei nie. ⁹Hy wil hê dat jy die egogeloof in kleinheid vervang met Sy Eie verheerlikte Antwoord op wat jy is, sodat jy kan ophou om dit in twyfel te trek en dit te ken vir wat dit is.  

1.c.

LES  121

Vergifnis is die sleutel tot geluk.

1. Hier is die antwoord op jou soeke na vrede. ²Hier is die sleutel tot betekenis in ’n wêreld wat geen sin blyk te hê nie. ³Hier is die pad na veiligheid vir die oënskynlike gevare wat lyk om jou om elke hoek en draai te bedreig, en wat al jou hoop om ooit rus en vrede te vind, laat wankel. ⁴Hier word alle vrae beantwoord; hier word die einde van alle onsekerheid uiteindelik verseker.
2. Die nie-vergewensgesinde geestesdenke is vol vrees, en dit bied liefde geen ruimte om homself te wees nie, geen plek waar dit in vrede sy vlerke kan uitsprei en bo die rumoer van die wêreld kan uitstyg nie. ²Die nie-vergewensgesinde geestesdenke is bedroef, sonder enige hoop op rus en bevryding van pyn. ³Dit ly en verkeer in ellende, loer rond in duisternis sonder om te sien, maar oortuig van die gevaar wat daar skuil.
3. Die nie-vergewensgesinde geestesdenke word deur twyfel verskeur, is verward oor homself en oor alles wat hy sien; hy is bang en kwaad, swak en raserig, bang om voort te gaan, bang om te bly, bang om wakker te word of te gaan slaap, bang vir elke geluid, maar selfs banger vir stilte; hy is doodbang vir die donker, maar nog meer vreesbevange vir naderende lig. ²Wat kan die nie-vergewensgesinde geestesdenke anders waarneem as sy verdoemenis? ³Wat kan hy sien behalwe die bewys dat al sy sonde werklik is?
4. Die nie-vergewensgesinde geestesdenke sien geen foute nie, maar slegs sonde. ²Dit beskou die wêreld met blinde oë, en gil van vrees as dit sy eie projeksies sien verskyn om die jammerlike parodie daarvan op die lewe, aan te val. ³Hy wil lewe, maar wens hy was dood. ⁴Hy wil vergifnis hê, maar bespeur geen hoop nie. ⁵Hy wil ontsnap, maar sien geen uitweg nie omdat hy oral die sondige sien.
5. Die nie-vergewensgesinde geestesdenke verkeer in wanhoop, sonder die vooruitsig op ’n toekoms wat iets anders as net meer wanhoop kan bied. ²Tog beskou hy sy oordeel van die wêreld as onherroeplik, en sien hy nie in dat hy homself tot hierdie wanhoop veroordeel het nie. ³Hierdie geestesdenke dink dat hy nie kan verander nie, want wat hy sien, getuig van die korrektheid van sy oordeel. ⁴Hy vra nie, want hy dink hy weet. ⁵Hy bevraagteken nie, want hy is so seker dat hy reg is.
6. Vergifnis word verwerf. ²Dit is nie eie aan die geestesdenke nie, wat nie kan sondig nie. ³Net soos sonde ’n idee is wat jy jouself aangeleer het, moet vergifnis ook deur jou geleer word, maar van ’n ander Onderwyser as jyself, Wat die ander Self in jou verteenwoordig. ⁴Hom leer jy hoe om die self wat jy dink jy gemaak het, te vergewe en te laat verdwyn. ⁵So gee jy jou geestesdenke as één terug aan Hom Wat jou Self is, en nooit kan sondig nie.
7. Elke nie-vergewensgesinde geestesdenke verskaf jou ’n geleentheid om jou eie geestesdenke te leer hoe om homself te vergewe. ²Elkeen wag op bevryding uit die hel deur middel van jou, en wend hom tot jou smekend om die Hemel, hier en nou. ³Hy  het geen hoop nie, maar jy word sy hoop. ⁴En as sy hoop, word jy jou eie hoop. ⁵Die nie-vergewensgesinde geestesdenke moet deur jou vergifnis leer dat hy uit die hel verlos is. ⁶En soos jy verlossing onderrig, sal jy leer. ⁷Maar al jou onderrig en leer sal nie van jou af kom nie, maar van die Onderwyser Wat jou gegee was om jou die pad te wys.
8. Ons oefen vandag om te leer om te vergewe. ²As jy gewillig is, kan jy vandag leer om die sleutel tot geluk te neem, en dit vir jouself te gebruik. ³Ons sal tien minute in die oggend en nog tien minute in die aand daaraan wy om te leer hoe om vergifnis te gee en ook hoe om vergifnis te ontvang.
9. Die nie-vergewende geestesdenke glo nie dat gee en ontvang dieselfde is nie. ²Ons sal nogtans vandag probeer leer dat hulle één is, deur vergifnis te oefen op iemand wat jy as ’n vyand beskou, en op iemand wat jy as ’n vriend beskou. ³En soos jy leer om hulle beide as één te sien, sal ons die les na jou uitbrei, en sien dat hulle ontsnapping joune ingesluit het.
10. Begin die langer oefenperiodes deur te dink aan iemand van wie jy nie hou nie, wat jou blyk te irriteer, of wat weersin in jou skyn op te roep as jy hom sou ontmoet, iemand wat jy daadwerklik minag, of bloot probeer om nie raak te sien nie. ²Dit maak nie saak watter vorm jou kwaadwees aanneem nie. ³Jy het hom heelwaarskynlik reeds  gekies. ⁴Hy is geskik.
11. Sluit nou jou oë en sien hom in jou verbeelding en kyk ’n rukkie na hom. ²Probeer om iewers in hom ’n bietjie lig raak te sien; ’n floue skynseltjie wat jy nooit opgemerk het nie. ³Probeer om ’n sprankie helderheid te vind wat deur die lelike prentjie wat jy van hom het, straal. ⁴Kyk na hierdie beeld totdat jy iewers ’n lig daarin sien, en probeer dan om hierdie lig te laat uitbrei totdat dit hom heeltemal omvou, en die beeld mooi en goed maak.
12. Kyk vir ’n rukkie na hierdie veranderde persepsie, en verskuif dan jou aandag na iemand wat jy as ’n vriend beskou. ²Probeer om die lig wat jy om jou vorige “vyand” leer sien het, na hom oor te dra. ³Sien hom nou as meer as ’n vriend vir jou, want in daardie lig wys sy heiligheid jou jou verlosser, sowel verlos en verlossend, genees en heel.
13. Laat hom jou dan die lig skenk wat jy in hom sien, en laat jou “vyand” en vriend jou saam seën met wat jy gegee het. ²Jy is nou één met hulle, en hulle met jou. ³Nou is jy deur jouself vergewe. ⁴Vergeet die hele dag deur nie die rol wat vergifnis speel om geluk aan elkeen se nie-vergewensgesinde geestesdenke te bring nie, joune ingeslote. ⁵Sê elke uur vir jouself:

⁶Vergifnis is die sleutel tot geluk. ⁷Ek sal ontwaak uit die droom dat ek kan sterf, dat ek feilbaar en vol sonde is, en ek sal weet dat ek die volmaakte Seun van God is.

1.d.

4. WAT  IS  DIE  EIENSKAPPE  VAN  GOD  SE  ONDERWYSERS?

1. Die uiterlike kenmerke van God se onderwysers is hoegenaamd nie dieselfde nie. ²Vir die liggaam se oë lyk hulle nie na mekaar nie, hulle kom uit totaal verskillende agtergronde, hulle ervaring van die wêreld verskil baie, en hulle oppervlakkige “persoonlikhede” loop heeltemal uiteen. ³En ook het hulle in die beginstadium van hulle funksie as onderwyser van God nog nie die diepere eienskappe verwerf wat hulle sal maak wat hulle is nie. ⁴God gee Sy onderwysers spesiale gawes, want hulle vervul ’n spesiale rol in Sy Versoeningsplan. ⁵Hulle spesiaalheid is natuurlik slegs tydelik: in die tyd geplaas as ’n middel om uit tyd uit te lei. ⁶Hierdie spesiale gawes, gebore in die heilige verhouding waarop die onderrig-leer situasie gerig is, word kenmerkend van alle onderwysers van God wat in hulle eie leerproses gevorder het. ⁷In hierdie opsig is hulle almal eenders.
2. Alle verskille tussen die Seuns van God is tydelik. ²Nietemin kan gesê word dat die gevorderde onderwysers van God in tyd die volgende eienskappe het:

I. Vertroue

1. Dit is die grondslag waarop hulle vermoë om hulle funksie te vervul, berus. ²Persepsie is die resultaat van leer. ³Trouens, persepsie is leer, omdat oorsaak en gevolg nooit geskei is nie. ⁴Die onderwysers van God het vertroue in die wêreld, want hulle het geleer dat dit nie regeer word deur die wette wat die wêreld opgemaak het nie. ⁵Dit word regeer deur ’n krag wat in hulle is, maar nie van hulle nie. ⁶Dit is hierdie krag wat alles veilig hou. ⁷Dit is deur hierdie krag dat die onderwysers van God ’n wêreld sien wat vergewe is.
2. As hierdie krag eers een keer ervaar is, is dit onmoontlik om weer op jou eie onbeduidende vermoëns te vertrou. ²Wie sou probeer om met die nietige vlerke van ’n mossie te vlieg as hy die magtige krag van ’n arend gegee is? ³En wie sou sy vertroue stel in die skamele aanbod van die ego as die gawes van God voor hom neergelê word? ⁴Wat is dit wat hulle die skuif laat maak?

1. Die ontwikkeling van vertroue

• Eerstens moet hulle deur ’n periode gaan wat “’n tyd van ongedaanmaking” genoem kan word. ²Dit hoef nie pynlik te wees nie, maar word gewoonlik so ervaar. ³Dit kom voor asof dinge weggeneem word, en aanvanklik word selde begryp dat die gebrek aan waarde van hierdie dinge bloot ingesien word. ⁴Hoe kan ’n gebrek aan waarde waargeneem word tensy die waarnemer in ’n posisie is waar hy dinge in ’n ander lig móét sien? ⁵Hy is nog nie op die punt waar hy innerlik die skuif volkome kan maak nie. ⁶En dus sal die plan soms veranderinge vra in wat uiterlike omstandighede blyk te wees. ⁷Hierdie veranderinge is altyd behulpsaam. ⁸Wanneer die onderwyser van God dit eenmaal geleer het, gaan hy voort met die tweede fase.
• Vervolgens moet die onderwyser deur “’n periode van uitsortering” gaan. ²Dit is altyd ietwat moeilik, want, noudat hy geleer het dat die veranderinge in sy lewe altyd behulpsaam is, moet hy voortaan oor alle dinge besluit op grond van die vraag of hulle die behulpsaamheid bevorder of belemmer. ³Hy sal ontdek dat baie, indien nie die meeste van die dinge wat hy voorheen van waarde geskat het nie, slegs sy vermoë belemmer om wat hy geleer het oor te dra na nuwe situasies, wanneer hulle opduik. ⁴Omdat hy waarde geheg het aan wat in werklikheid waardeloos is, sal hy nie die les veralgemeen nie uit vrees vir verlies en opoffering. ⁵Dit verg besondere leerwerk om te begryp dat alle dinge, gebeure, ontmoetings, en omstandighede behulpsaam is. ⁶Slegs in die mate waarin hulle behulpsaam is, kan daar in hierdie wêreld van illusies enige graad van werklikheid aan hulle toegeken word. ⁷Die woord “waarde” kan op niks anders toegepas word nie.
• Die derde fase waardeur die onderwyser van God moet gaan, kan “’n periode van laatvaarding” genoem word. ²As dit geïnterpreteer word as die opgee van wat begeerlik is, sal dit enorme konflik veroorsaak. ³Min onderwysers van God spring dit heeltemal vry. ⁴Dit het egter geen sin om die waardevolle van die waardelose uit te sorteer, as die volgende voor die hand liggende stap nie geneem word nie. ⁵Daarom is die periode van oorvleueling geneig om een te wees waarin die onderwyser van God hom geroepe voel om sy eie beste belange op te offer ten gunste van die waarheid. ⁶Hy het nog nie besef hoe volkome onmoontlik so ’n eis sou wees nie. ⁷Hy kan dit alleenlik  leer as hy daadwerklik die waardelose opgee. ⁸Hierdeur leer hy dat waar hy droefheid verwag het, hy ’n blye lughartigheid in plaas daarvan ontdek, en waar hy gedink het dat iets van hom gevra was, hy agterkom dat ’n geskenk aan hom gegee word. 
• Nou volg “’n periode van stabilisering”. ²Dit is ’n stil tyd, waartydens die onderwyser van God ’n rukkie in vrede rus. ³Nou konsolideer hy wat hy geleer het. ⁴Nou begin hy die oordragswaarde sien van wat hy geleer het. ⁵Die moontlikhede hiervan is letterlik verstommend, en die onderwyser van God het nou op die punt in sy vordering gekom waar hy daarin sy volledige toekomspad sien. ⁶“Gee op wat jy nie wil hê nie, en behou wat jy wil hê.” ⁷Hoe eenvoudig is die voor die hand liggende nie! ⁸En hoe maklik om te doen! ⁹Die onderwyser van God het hierdie tydperk van verposing nodig. ¹⁰Hy het nog nie so ver gekom as wat hy dink nie. ¹¹Maar wanneer hy gereed is om voort te gaan, loop hy met magtige metgeselle langs hom. ¹² Nou rus hy ’n tydjie, en versamel hulle voordat hy voortgaan. ¹³Hy sal nie van hier af alleen voortgaan nie.
• Die volgende fase is voorwaar “’n periode van onbestendigheid”. ²Nou moet die onderwyser van God begryp dat hy nie werklik geweet het wat waardevol en wat waardeloos was nie. ³Al wat hy tot dusver werklik geleer het, is dat hy nie die waardelose wou hê nie, en dat hy die waardevolle wel wou hê. ⁴Maar om hom die verskil te leer, was sy eie uitsortering van geen betekenis nie. ⁵Die idee van opoffering, wat so sentraal staan in sy eie denksisteem, het dit vir hom onmoontlik gemaak om te oordeel. ⁶Hy het gedink dat hy gewilligheid geleer het, maar nou sien hy dat hy nie weet waarvóór die gewilligheid is nie. ⁷En nou moet hy ’n toestand bereik wat vir ’n lang tyd onbereikbaar bly. ⁸Hy moet leer om alle oordeel te laat vaar, en alleenlik te vra wat hy werklik in elke situasie wil hê. ⁹As dit nie so was dat elke stap in hierdie rigting so nadruklik versterk was nie, sou dit inderdaad moeilik wees!
• En ten slotte is daar “’n periode van voltooiing”. ²Hier word wat geleer was, gekonsolideer. ³Wat vroeër gesien was as skadubeelde, word nou soliede wins, waarop sowel in alle tye van nood, as in rustige tye gereken kan word. ⁴Die rustigheid is inderdaad die resultaat daarvan: die vrug van opregte leer, van konsekwente denke en volledige oordrag. ⁵Dit is die fase van werklike vrede, want hier word die hemelse staat ten volle weerspieël. ⁶Hiervandaan is die pad na die Hemel oop en maklik. ⁷Trouens, dit is hier. ⁸Wie sou êrens “heen” gaan as vrede van geestesdenke alreeds volkome is? ⁹En wie sou probeer om die rustigheid te ruil vir iets meer begeerliks? ¹⁰Wat sou nog begeerliker kon wees?

II. Eerlikheid

1. Al die ander eienskappe van God se onderwysers berus op vertroue. ²Sodra dit eenmaal verwerf is, kan die ander nie anders as om te volg nie. ³Slegs hulle wat vertrou, kan vir hulle eerlikheid veroorloof, want slegs hulle kan die waarde daarvan sien. ⁴Eerlikheid geld nie net vir wat jy sê nie. ⁵Die term beteken wesenlik konsekwentheid. ⁶Niks wat jy sê, is in teenspraak met wat jy dink of doen nie; nie een enkele gedagte weerspreek ’n ander nie, geen daad weerspreek jou woord nie, en iedere woord bevestig die ander. ⁷Só is hulle wat waarlik eerlik is. ⁸Op geen vlak is hulle in konflik met hulleself nie. ⁹Daarom is dit vir hulle onmoontlik om in konflik met enigeen of enigiets te wees.
2. Die vrede van geestesdenke wat die gevorderde onderwysers van God ervaar, is hoofsaaklik te danke aan hulle volmaakte eerlikheid. ²Dit is alleenlik die begeerte om te mislei, wat tot stryd lei. ³Niemand wat één met homself is, kan hom konflik eers voorstel nie. ⁴Konflik is die onvermydelike gevolg van selfmisleiding, en selfmisleiding is oneerlikheid. ⁵Daar is nie ’n uitdaging vir ’n onderwyser van God nie. ⁶Uitdaging impliseer twyfel, en die vertroue waarop God se onderwysers veilig rus, maak twyfel onmoontlik. ⁷Daarom kan hulle alleen maar slaag. ⁸Hierin, soos in alle dinge, is hulle eerlik. ⁹Hulle kan alleen slaag, want hulle volg nooit hulle eie wil alléén nie. ¹⁰Hulle kies vir die hele mensdom, vir die hele wêreld en alles daarin, vir wat agter uiterlike vorme onveranderlik en onveranderbaar is, en hulle kies vir die Seun van God en sy Skepper. ¹¹Hoe sou hulle nie kan slaag nie? ¹²Hulle kies in volmaakte eerlikheid, so seker van hulle keuse soos van hulleself.

III. Verdraagsaamheid

1. God se onderwysers oordeel nie. ²Om te oordeel, beteken om oneerlik te wees, want om te oordeel, beteken om ’n posisie in te neem wat jy nie het nie. ³Oordeel sonder selfmisleiding, is onmoontlik. ⁴Oordeel impliseer dat jy in jou broers teleurgesteld is.  ⁵Hoe sou jy dan nie in jouself teleurgesteld kon wees nie? ⁶Oordeel impliseer ’n gebrek aan vertroue, en vertroue bly die hoeksteen van die hele denksisteem van die onderwyser van God. ⁷Laat dit verlore gaan, en alles wat hy geleer het, verdwyn. ⁸Sonder oordeel is alles ewe aanvaarbaar, want wie kan dan ánders oordeel? ⁹Sonder oordeel is alle mense broers, want wie staan alleen? ¹⁰Oordeel vernietig eerlikheid en verpletter vertroue. ¹¹Geen onderwyser van God kan oordeel en hoop om te leer nie.

IV. Sagmoedigheid

1. Om iemand kwaad aan te doen, is vir God se onderwysers onmoontlik. ²Hulle kan nóg kwaad aandoen, nóg kwaad aangedoen word. ³Kwaad aandoen, is die resultaat van oordeel. ⁴Dit is die oneerlike daad wat volg op ’n oneerlike gedagte. ⁵Dit is ’n vonnis van skuld wat uitgespreek word oor ’n broer, en daarom oor jouself. ⁶Dit is die einde van vrede en die weiering om te leer. ⁷Dit bewys die afwesigheid van God se leerplan, en die vervanging daarvan deur waansin. ⁸Daar is geen onderwyser van God wat nie moet leer nie – en dit taamlik vroeg in sy opleiding – dat om kwaad aan te doen, sy funksie heeltemal uit sy bewussyn wis. ⁹Dit sal hom verward, bang, kwaad en agterdogtig maak. ¹⁰Dit sal die Heilige Gees se lesse onmoontlik maak om te leer. ¹¹Ook kan God se Onderwyser nie in die minste gehoor word nie, behalwe deur diegene wat besef dat met kwaad in werklikheid niks bereik kan word nie. ¹²Daar kan niks mee gewen word nie.
2. Daarom is God se onderwysers volkome sagmoedig. ²Hulle het die krag van sagmoedigheid nodig, want juis hierdeur word die funksie van verlossing vergemaklik. ³Vir diegene wat kwaad wil aandoen, is dit onmoontlik. ⁴Vir diegene vir wie kwaad aandoen geen betekenis het nie, is dit bloot iets natuurliks. ⁵Watter ander keuse behalwe hierdie een het meer betekenis vir hulle wat innerlik gesond is? ⁶Wie kies die hel as hy ’n pad na die Hemel sien? ⁷En wie sou die swakheid kies wat uit kwetsing moet kom, in plek van die onfeilbare, alomvattende en grenslose krag van sagmoedigheid? ⁸Die mag van God se onderwysers lê in hulle sagmoedigheid, want hulle het begryp dat hulle bose gedagtes nóg van God se Seun nóg van sy Skepper afkomstig was. ⁹Dus het hulle hulle gedagtes verenig met Hom Wat hulle Bron is. ¹⁰En so is hulle wil, wat altyd van Homself was, vry om homself te wees.

V. Vreugde

1. Vreugde is die onvermydelike gevolg van sagmoedigheid. ²Sagmoedigheid beteken dat vrees nou onmoontlik is, en wat sou daar nog kon wees om die vreugde te versteur? ³Die oop hande van sagmoedigheid is altyd gevul. ⁴Die sagmoediges het geen pyn nie. ⁵Hulle kan nie ly nie. ⁶Waarom sou hulle nie vreugdevol wees nie? ⁷Hulle is seker dat hulle bemin word en altyd veilig sal wees. ⁸Vreugde gaan saam met sagmoedigheid so seker as wat droefheid aanval vergesel. ⁹God se onderwysers vertrou op Hom. ¹⁰En hulle is seker dat Sy Onderwyser hulle vooruit loop, en verseker dat hulle geen kwaad kan oorkom nie. ¹¹Hulle besit Sy gawes en volg Sy pad, want God se Stem lei hulle in alles. ¹²Vreugde is hulle danklied. ¹³En Christus kyk ook in dank op hulle neer. ¹⁴Sy behoefte aan hulle is net so groot as hulle s’n vir Hom. ¹⁵Hoe vreugdevol is dit nie om die doel van verlossing met mekaar te deel nie!

VI. Verdedigingsloosheid

1. God se onderwysers het geleer hoe om eenvoudig te wees. ²Hulle het geen drome wat teen die waarheid verdedig hoef te word nie. ³Hulle probeer nie om hulleself te maak nie. ⁴Hulle vreugde kom voort uit hulle insig omtrent Wie hulle geskep het. ⁵En benodig dit wat God geskep het verdediging? ⁶Niemand kan ’n gevorderde onderwyser van God word solank hy nie ten volle begryp dat alle vorme van verdediging slegs dwase bewakers van waansinnige illusies is nie. ⁷Hoe grotesker die droom is, hoe feller en magtiger blyk die verdediging daarvan te wees. ⁸Maar wanneer die onderwyser van God uiteindelik instem om daaragter te kyk, ontdek hy dat daar niks was nie. ⁹Aan die begin gaan dit maar moeilik om hom nie meer te laat mislei nie. ¹⁰Maar hy leer vinniger namate sy vertroue toeneem. ¹¹Dit is nie gevaar wat aankom as verdediging laat vaar word nie. ¹²Dit is veiligheid. ¹³Dit is vrede. ¹⁴Dit is vreugde. ¹⁵En dit is God. 

VII. Vrygewigheid

1. Die term vrygewigheid het vir die onderwyser van God besondere betekenis. ²Dit is nie die gebruiklike betekenis van die woord nie; dit is trouens ’n betekenis wat geleer en baie versigtig geleer moet word. ³Soos al die ander kenmerke van God se onderwysers berus hierdie een uiteindelik op vertroue, want sonder vertroue kan niemand in die ware sin van die woord vrygewig wees nie. ⁴Vir die wêreld beteken vrygewigheid “weggee” in die sin van “opgee”. ⁵Vir die onderwysers van God beteken dit weggee om te kan behou. ⁶Dit word dwarsdeur die hele teks en werkboek beklemtoon, maar is miskien vir die denke van die wêreld vreemder as baie ander idees in ons leerstof. ⁷Die groter vreemdheid daarvan lê bloot in die voor die hand liggende feit dat dit die denke van die wêreld omkeer. ⁸Op die duidelikste moontlike manier en op die eenvoudigste vlak beteken die woord vir die onderwysers van God presies die teenoorgestelde as vir die wêreld.
2. Die onderwyser van God is vrygewig uit Selfbelang. ²Dit verwys egter nie na die self waarvan die wêreld praat nie. ³Die onderwyser van God wil nie iets hê wat hy nie kan weggee nie, want hy besef dat dit vir hom per definisie waardeloos sou wees. ⁴Waarvóór sou hy dit wil hê? ⁵Hy kan alleenlik daardeur verloor. ⁶Hy kan niks daardeur wen nie. ⁷Daarom soek hy nie na wat hy alleen kan behou nie, want dit is ’n waarborg vir verlies. ⁸Hy wil nie ly nie. ⁹Waarom sou hy hom van pyn verseker? ¹⁰Maar hy wil wel vir hom alle dinge behou wat van God af kom, en daarom vir Sy Seun bestem is. ¹¹Dít is die dinge wat aan hom behoort. ¹²Dié kan hy in ware vrygewigheid weggee, waardeur hy hulle vir ewig vir homself bewaar.

VIII. Geduld

1. Diegene wat seker van die uitkoms is, kan hulle veroorloof om te wag, en wel sonder om onrustig te wees. ²Geduld is vir die onderwyser van God vanselfsprekend. ³Al wat hy sien, is ’n gewisse uitkoms, miskien op ’n tydstip wat vir hom nog onbekend is, maar waaroor geen twyfel bestaan nie. ⁴Die tyd sal ewe reg wees as die antwoord. ⁵En dit is waar vir alles wat nou of in die toekoms gebeur. ⁶Ook die verlede bevat geen foute nie, niks wat nie tot voordeel van die wêreld gedien het nie en ook niks wat nie tot voordeel gedien het van hulle wat lyk asof hulle die slagoffers van foute was nie.  ⁷Miskien was dit destyds nie begryp nie. ⁸Nietemin is die onderwyser van God gewillig om al sy besluite uit die verlede te heroorweeg. ⁹Geduld is vanselfsprekend vir die wat vertrou. ¹⁰Verseker van die finale interpretasie van alle dinge in tyd, kan geen gebeurlikheid wat nou al gesien word of nog moet kom, vir hulle vrees inboesem nie. 

IX. Trou

1. Die mate van trou van die onderwyser van God is die maatstaf vir sy vordering in die leerplan. ²Kies hy nog steeds sekere aspekte van sy lewe uit om van te leer, terwyl hy ander buite rekening laat? ³Indien wel, is sy vordering beperk, en sy vertroue nog nie stewig gevestig nie. ⁴Trou is die onderwyser van God se vertroue in die Woord van God om alle dinge reg te stel, nie sommige nie, maar almal. ⁵Gewoonlik geld sy trou aanvanklik vir slegs enkele probleme, en bly hy ’n tyd lank versigtig daartoe beperk. ⁶Om alle probleme oor te gee aan een Antwoord beteken om die denke van die wêreld heeltemal om te keer. ⁷En dit alleen is trou. ⁸Niks anders verdien werklik die naam nie. ⁹Nogtans is elke graad van trou, hoe klein ook al, werd om bereik te word. ¹⁰Bereidwilligheid is, soos die teks dit stel, nog nie meesterskap nie.  
2. Ware trou wyk egter nie af van die weg nie. ²Omdat dit konsekwent is, is dit volkome eerlik. ³Omdat dit onwankelbaar is, is dit vol vertroue. ⁴Omdat dit gebaseer is op onbevreesdheid, is dit sagmoedig. ⁵Omdat dit seker is, is dit vreugdevol. ⁶En omdat dit vol selfvertroue is, is dit verdraagsaam. ⁷Trou kombineer dan ook die ander kenmerke van God se onderwysers. ⁸Dit impliseer aanvaarding van die Woord van God en Sy definisie van Sy Seun. ⁹Dit is op Hulle dat trou in die ware sin van die woord altyd gerig word. ¹⁰Trou kyk na Hulle en soek tot hy vind. ¹¹Verdedigingsloosheid gaan van nature met trou saam, en vreugde is die wesenlike staat waarin hy verkeer. ¹²En wanneer hy gevind het, rus hy in stille sekerheid alleen op dít wat alle trou verdien.

X. Oopheid van geestesdenke

1. Die sentrale plek wat oop geestesdenke inneem, miskien die laaste van die kenmerke wat die onderwyser van God verwerf, word maklik begryp wanneer die verwantskap daarvan met vergifnis ingesien word. ²Oop geestesdenke ontstaan wanneer oordeel agterweë bly. ³Net soos oordeel die geestesdenke vir God se Onderwyser toemaak, so nooi openheid van geestesdenke Hom om in te kom. ⁴Net soos veroordeling die Seun van God as boos oordeel, so laat oop geestesdenke toe dat hy beoordeel word deur die Stem wat namens God in Sy Naam spreek. ⁵Net soos die projeksie van skuld op die Seun van God hom na die hel stuur, so laat oop geestesdenke Christus se beeld na hom uitbrei. ⁶Alleen hulle wat oop van geestesdenke is, kan vrede hê, want alleen hulle sien redes daartoe.
2. Hoe vergewe hulle wat oop van geestesdenke is? ²Hulle het alles wat in die pad van vergifnis staan, laat vaar. ³Hulle het die wêreld in der waarheid opgegee, en dit aan hulle laat teruggee in ’n nuutheid en vreugde so glorieryk dat hulle so ’n verandering vir hulleself nooit sou kon voorstel nie. ⁴Niks is nou soos dit vroeër was nie. ⁵Daar is niks wat voorheen so saai en leweloos gelyk het, wat nou nie sprankel nie. ⁶En bowenal is alles uitnodigend, want bedreiging is weg. ⁷Daar is geen wolke meer om die gesig van Christus te verberg nie. ⁸Die doel is nou bereik. ⁹Vergifnis is die einddoel van die leerplan. ¹⁰Dit  berei die weg voor vir dit wat leer ver te bowe gaan.  ¹¹Die leerplan wend nie ’n poging aan om die ware doel daarvan te oorskry nie. ¹²Vergifnis is al waarna gestreef word, en in hierdie doelwit kom alle leer uiteindelik bymekaar. ¹³Dit is inderdaad voldoende.

• Jy het miskien opgemerk dat die lys van kenmerke van God se onderwysers nie dinge insluit wat die Seun van God se erfenis is nie. ²Terme soos liefde, sondeloosheid, volmaaktheid, kennis en ewige waarheid kom nie in dié verband voor nie. ³Hulle sou hier hoogs onvanpas wees. ⁴Wat God gegee het, gaan ons leerplan so ver te bowe dat leer in die teenwoordigheid daarvan net verdwyn. ⁵Maar terwyl die teenwoordigheid daarvan versluier bly, kom die fokus tereg die leerplan toe. ⁶Dit is die funksie van God se onderwysers om ware leer na die wêreld uit te dra. ⁷Streng gesproke is dit afleer wat hulle uitdra, want dít is in die wêreld “ware leer”. ⁸Dit is aan die onderwysers van God gegee om die blye tyding van totale vergifnis aan die wêreld te bring. ⁹Salig is hulle inderdaad, want hulle is die bringers van verlossing.

1.e.

1. GEESTESDENKE – GEES

1. Die term geestesdenke (Engels mind) word gebruik om die aktiverende deel of beginsel van die gees (Engels spirit) weer te gee, wat die gees van skeppende energie voorsien.  ²Wanneer die term met ’n hoofletter geskryf is, verwys dit na God of Christus (d.w.s. die Geestesdenke van God of die Geestesdenke van Christus). ³Gees is die Gedagte van God (Engels the Thought of God) wat Hy na Sy gelykenis geskep het. ⁴Die gees wat verenig is, is God se enige Seun, of Christus.
2. Omdat die geestesdenke gesplete is, kom dit in hierdie wêreld voor asof die Seuns van God geskei is. ²Ook lyk dit of hulle geestesdenke nie verbind is nie. ³In hierdie toestand van illusie lyk dit of die konsep van “’n individu se geestesdenke” betekenis het. ⁴Dit word daarom in die kursus beskryf asof hy uit twee dele bestaan: gees en ego.
3. Die gees is die deel wat nog steeds in kontak met God is deur die Heilige Gees, wat in hierdie deel bly, maar die ander deel eweneens sien. ²Die term “siel” word nie gebruik nie, behalwe in direkte bybelaanhalings, vanweë die hoogs kontroversiële aard daarvan. ³Dit sou egter ’n ekwivalent kon wees vir “gees”, met dien verstande dat hy, aangesien hy van God is, ewig is en nooit gebore was nie.
4. Die ander deel van die geestesdenke is geheel en al denkbeeldig en veroorsaak slegs illusies. ²Die gees behou die potensiaal om te skep, maar sy Wil, wat God se Wil is, blyk gevange gehou te wees solank die geestesdenke nie verenig is nie. ³Die skepping gaan onversteurd voort, want dit is die Wil van God. ⁴Hierdie Wil is altyd verenig en het daarom geen betekenis in hierdie wêreld nie. ⁵Dit ken geen teenoorgestelde en geen gradering nie.
5. Die geestesdenke kan reg of verkeerd gerig wees, afhangende van die stem waarna dit luister. ²Die regte geestesdenke (Engels right-mindedness)luister na die Heilige Gees, vergewe die wêreld, en sien in plaas daarvan met die visie van Christus die werklike wêreld. ³Dit is die finale visie, die laaste persepsie, die toestand waarin God Self die finale stap neem. ⁴Hier eindig sowel tyd as illusies.
6. Die verkeerde geestesdenke (Engels wrong-mindedness)luister na die ego en maak illusies, neem sonde waar,  regverdig woede, en sien skuld, siekte en die dood as werklik. ²Sowel hierdie wêreld as die werklike wêreld is illusies, want die regte geestesdenke kyk eenvoudig daar verby, of vergewe dit wat nooit plaasgevind het nie. ³Daarom is dit nie die Éénheid van geestesdenke (Engels One-mindedness)van die Christus-Geestesdenke nie, Wie se Wil één met die van God  is.
7. In hierdie wêreld is die enigste oorblywende vryheid die vryheid van keuse: altyd tussen twee keuses of twee stemme. ²Die wil is nie betrokke by persepsie op enige vlak nie, en het niks met keuse te doen nie. ³Die bewuste (Engels consciousness)is die ontvangsmeganisme, wat boodskappe van bo of onder ontvang; van die Heilige Gees of die ego. ⁴Die bewuste het vlakke en bewustheid kan heel dramaties verskuiwe, maar dit kan nie die terrein van persepsie te bowe gaan nie. ⁵Op sy beste word die bewuste van die werklike wêreld bewus, en dit kan geoefen word om dit in toenemende mate te doen.  ⁶Maar die einste feit dat dit vlakke het en geoefen kan word, bewys dat dit nie kennis kan bereik nie.